Senat Tóraǵasy óz sózinde Saýd Arabııasy Koroldigi Qazaqstannyń Taıaý Shyǵystaǵy jaqyn seriktesi ekenin jáne eki el arasynda jan-jaqty yntymaqtastyq ornaǵanyn habarlady. Palata Tóraǵasy eskergendeı, ózara baılanystyń damýyna joǵary deńgeıdegi júıeli saıası dıalog negiz bolyp otyr.
2022 jyly Qazaqstan Prezıdenti Qasym-Jomart Toqaevtyń Djıddaǵa jasaǵan sapary memleketter arasyndaǵy qarym-qatynasqa aıtarlyqtaı serpin berdi. Sol kezde sapardyń qorytyndysy boıynsha týrızm, sport, aýyl sharýashylyǵy, farmasevtıka jáne basqa da salalardy qamtıtyn ekijaqty 13 qujatqa qol qoıyldy.
Senat Tóraǵasy Qazaqstan Parlamenti Senaty men Saýd Arabııasy ash-Shýrasy Medjlısi arasyndaǵy yntymaqtastyqty nyǵaıtýdyń mańyzyna da nazar aýdardy. Sonymen qatar Memleket basshysynyń bastamasymen elimizde qolǵa alynǵan keshendi reformalardyń iske asyrylý barysy talqylandy.
Sondaı-aq Senat Spıkeri Álemdik jáne dástúrli dinder lıderleri Seziniń qyzmeti týraly aıtyp, Koroldiktiń din kóshbasshylaryn bıyl kúzde ótetin Sezd Hatshylyǵynyń mereıtoılyq otyrysyna qatysýǵa shaqyrdy.
