«Birinshi quryltaı Jalpyulttyq referendýmnan keıin shaqyryldy. Sodan beri, mine, bir jyl ótti. Bul Ádiletti Qazaqstandy qurý jolynda aıryqsha mańyzy bar tarıhı kezeń boldy. Biz Ata zańymyzǵa ádildik rýhyn sińire otyryp, konstıtýsııalyq reforma jasadyq. Bul ózgerister memlekettigimizdiń tuǵyryn bekite tústi. Sonymen qatar elimizdiń uzaq merzimge arnalǵan demokratııalyq baǵdaryn aıqyndap berdi.
Bıliktiń basty ınstıtýttary qysqa merzim ishinde múlde basqasha sıpatqa ıe boldy. Sheshim qabyldaý úderisine azamattardyń qatysý múmkindigi edáýir keńeıdi. Adam quqyqtary men bostandyqtaryn qorǵaý júıesi nyǵaıdy. Osynyń bári elimizdiń saıası qurylymyn ornyqty jáne tıimdi etip qaıta qurýǵa septigin tıgizdi. Barynsha ádil, ashyq ári básekege laıyq júıe qalyptasty. Keıbir adamdar reformalardyń tabysty bolaryna kúmánmen qaraǵan edi», dedi Memleket basshysy.
Sonymen qatar Prezıdent aýqymdy saıası jańǵyrý jospary ret-retimen júzege asyrylyp, biraz jumys atqarylǵanyn aıtty. Elimizdiń 2-3 jyl burynǵy, tipti, bir jyl burynǵy qalpynan aıtarlyqtaı ózgergenin atap ótti. Buǵan yntymaq-birliktiń jáne syndarly qoǵamdyq dıalogtyń arqasynda qol jetkizilgenin sóz etti.
