«Kez kelgen tujyrymdama nemese doktrına qarapaıym ári túsinikti bolýy kerek. Áıtpese, bári jasandy bolyp shyǵady. Ondaı ıdeıany halyq qabyldamaıdy. О́mirsheń, keleshegi zor ıdeologııalar memleket pen qoǵamnyń ortaq izdenisiniń arqasynda ǵana paıda bolady», dedi Memleket basshysy.
Prezıdenttiń aıtýynsha, táýelsiz Qazaqstanda rýhy azat, kózi ashyq, kókiregi oıaý urpaq ósip keledi.
«Biz dástúrli qundylyqtarymyzdy qazirgi mádenı úrdistermen úılestirýimiz kerek. Elimizde otanshyl, jasampaz, batyl, daryndy, bilimdi, ozyq ári eńbekqor jandar óte kóp. Men osyndaı azamattardy kórgende bolashaǵymyzdyń jarqyn bolaryna zor senimmen qaraımyn. Táýelsiz Qazaqstanda rýhy azat, kózi ashyq, kókiregi oıaý urpaq ósip keledi. Olar ǵylym-bilim, mýzyka, kıno, sport jáne basqa da salalarda tabysqa jetip, búkil álemge tanymal bola bastady. Jastarymyz týǵan jerdiń qaıtalanbas ereksheligin jáne týǵan eldiń biregeı bolmysyn jer júzine tanytyp júr», dedi Prezıdent Ulttyq quryltaı barysynda.
