«Tazalyq pen uqyptylyq kúndelikti ómir saltymyzǵa aınalýy qajet. Qalalar men aýyldardyń sáýletti, saıabaqtar men aýlanyń taza bolýy, eń aldymen, basqa bireýge emes, ózimizge kerek. Jurttyń bári óz úıiniń jaıly ári ádemi bolǵanyn qalaıdy. Bul – durys. Azamattarymyz qoǵamdyq oryndar men qorshaǵan ortaǵa da dál sondaı janashyr kózben qaraýǵa tıis», dedi Memleket basshysy.
Jaqynda elimizdiń iri qalalarynda sý tapshylyǵy baıqalǵany belgili. Osy tusta Qasym-Jomart Kemeluly bul túıtkil – ákimderdiń jumysyndaǵy naǵyz olqylyq ekenin qadap aıtty.
«Qazaqstan – bárimizge ortaq, onyń qandaı bolatyny tek bizge baılanysty. Iаǵnı, biz ishi de, syrty da bútin el bolýymyz kerek. Jaqynda iri qalalarymyzda sý tapshylyǵy paıda boldy, turǵyndar narazylyǵyn bildirip jatyr. Bul da – oryndy. Osy túıtkil – ákimderdiń jumysyndaǵy naǵyz olqylyq. Ony tez arada túzetý kerek. Ákimderdiń qolynan kelmese, tıisti sheshimderdi qabyldaımyn. Negizgi maqsat – tabysty bolyp kóriný emes, shyn máninde tabysty memleket bolý. Bul myzǵymas qaǵıda bolýǵa tıis», dedi Memleket basshysy.
Prezıdenttiń aıtýynsha, jańa qoǵamdyq etıkany qalyptastyrǵan memlekette zań men tártip, senim jáne jaýapkershilik sııaqty qundylyqtar ústem bolady.
«Elimizde jańa qoǵamdyq etıka qalyptasýy kerek. Onda eldiń birligi jáne turaqtylyǵy, azamattardyń ózara tilektestigi, ádildik, zań men tártip, senim jáne jaýapkershilik sııaqty qundylyqtar ústemdik qurýy qajet. Otanshyldyq, adamgershilik, bilimpazdyq, naǵyz maman bolý, únemshildik, eńbekqorlyq, el men jerge janashyrlyq sııaqty asyl qasıetter bárinen bıik turýǵa tıis. Osyndaı izgi qasıettiń bárin boıyna sińirgen jandy – Adal azamat degen bir aýyz sózben sıpattaýǵa bolady», dep túıindedi Memleket basshysy.
