«Barlyq quzyrly organdar osyndaı tásilmen jumys isteýge mindetti. Men muny únemi aıtyp júrmin. Túptep kelgende, bul – turaqtylyq pen tynyshtyqtyń, ósip-órkendeýdiń kepili. «Halyq únine qulaq asatyn memleket» tujyrymdamasynyń mán-mańyzy, ózegi – osynda.
Qazir áleýmettik zertteý júrgizý úshin túrli mekemelerge qyrýar qarjy bólinedi. Biraq, jumys júıeli emes, sondyqtan nátıjesi kúmándi bolyp shyǵady. Bul jumysty bir jerden uıymdastyryp, keshendi túrde júrgizý kerek», dedi Prezıdent.
Sondaı-aq ol bizge saraptaý-taldaý qyzmetin tıimdi júrgizetin myqty ortalyqtar jelisi qajet ekenin atap ótti.
«Bul qurylymdar sapaly ári suranysqa ıe ıntellektýaldy ónim usynýǵa tıis. Elimiz ıdeologııalyq derbestigin saqtaý úshin munyń aıryqsha mán-mańyzy bar. Saraptama ortalyqtary elimiz egemendik kezeńinde júrip ótken joldyń ár baǵytyn zertteýge tıis. Kemshilikterdiń sebep-saldaryn anyqtaý qajet. Úkimet jańa jospar jasaǵanda osy faktorlar eskerilýi kerek. Ǵylym men zertteýge negizdelgen saıasat tabysty bolady», dep atap ótti el Prezıdenti.
