Álem eriktileri men eriktiler uıymdary úshin eń iri halyqaralyq is-sharaǵa 34 elden 40-tan asa spıker, jalpy 400-ge jýyq adam qatysyp otyr.
Forým sheńberinde «Halyqaralyq volonterlik bastamalar: tásilder men tájirıbeler» atty birinshi paneldik sessııanyń otyrysy ótti. Sessııa barysynda Túrki memleketteri Uıymynyń Bas hatshysy Kýbanychbek Omýralıev sóz sóılep, búginde eriktilerdiń bastamasymen qoǵamda kóptegen másele oń sheshimin taýyp júrgenin atap ótti. Spıker óz sózinde COVID-19 pandemııasy, Túrkııa men Sırııada bolǵan jer silkinisi kezinde jumyla birikken halyqaralyq eriktilerdiń kómegin erekshe atap ótti.
«2020 jyly koronavırýs pandemııasy órship turǵan kezde Qazaqstan men Ázerbaıjanda Túrki memleketteri Uıymynyń bastamasymen «Eriktiler jyly» jarııalandy. Osy bastamanyń arqasynda álemdik deńgeıdegi mańyzdy is-sharalar uıymdastyryldy. Adamzatqa óz erkimen kómek kórsetýge nıet bildirgen eriktiler judyryqtaı jumylyp, álemniń túpkir-túpkirinde qaıyrymdylyq jumystaryn júrgizdi. Al osy jyldyń 6 aqpanynda baýyrlas Túrkııa elinde myńdaǵan adamnyń ómirin qıǵan jer silkinisi bolǵany áli esimizde. Bul qaıǵyly jaǵdaı volonterlik qozǵalystyń mán-mańyzyn aıtarlyqtaı arttyra tústi. Máselen, baýyrlas halyqqa 100 tonnadan astam gýmanıtarlyq kómek jóneltildi. Qazaqstan men Qyrǵyzstannan eriktiler jumyldyrylyp, úısiz qalǵan baýyrlarymyzǵa arnaıy kıiz úıler jóneltildi», dedi Túrki memleketteri Uıymynyń Bas hatshysy.
Spıkerdiń aıtýynsha, osy jyldyń 16 naýryzynda Ankarada «Eriktiler» sammıti ótken. Atalmysh sammıtke Túrkııadaǵy zilzala kezinde qol ushyn sozǵan eriktiler uıymdarynyń músheleri qatysyp, volonterlik jumystyń damýyna úlken úles qosqan.
