«Oı túbinde jatqan sóz», «Sóz syryna qushtarlyq», «Tildestirmek tilshiden» atty úsh bólimnen turatyn jınaqqa avtordyń keıingi jyldary ult taǵdyry, el jaǵdaıy, til máselesine qatysty maqalalary men suhbattary engen.
Osy kitapqa jazǵan alǵy sózinde kórnekti qalamger, tarıhshy, Memlekettik syılyqtyń laýreaty Qoıshyǵara Salǵara: «О́z basym úsh taraýǵa toptastyrylyp, elý túrli taqyrypty qamtyǵan qoljazbany túgel oqyp shyqqanda ártúrli oqıǵalardan quralǵan úzik-úzik shaǵyn áńgimelerdi emes, qazaq halqy bastan keshirgen tirliktiń belgili bir kezeńiniń bar bolmysyn kóz aldyńa ákelgen «bas-aıaǵy bútin» tolyqqandy tutas bir kórkem shyǵarmany oqyǵandaı kúı keshtim. Jınaqqa engen eńbekterdiń qaı-qaısysynyń da aqparattyq maǵlumatynyń tanymdyq taǵylymy basym. Osyǵan oraı bulardy gazet maqalalary degennen góri «etnografııalyq tanymdyq shaǵyn áńgimeler jınaǵy» dep qabyldasaq ta artyq bolmaıtyn sekildi», dep baǵa beripti.
Mazmundy sharada belgili jazýshy, tarıh ǵylymdarynyń doktory, professor Tursynhan Zákenuly onyń qalamy tóselgen qarymdy jýrnalıst ekenin atap ótti.
« Ol Qytaıdaǵy «Shyńjań» gazetinde biraz jyl qyzmet istep, qalyptasty. Betkeustar tilshi boldy. Onyń bir artyqshylyǵy – qytaı men qazaq jýrnalıstıkasynyń ereksheligin boıyna sińirip, sony shyǵarmashylyǵynda sheber paıdalanady», dedi ol.
Sondaı-aq is-shara barysynda jazýshy Qoıshyǵara Salǵara, túrkolog ǵalym Qarjaýbaı Sartqojauly, «Elorda Aqparat» JShS dırektory Oljas Sydyqbek, «Astana aqshamy» gazetiniń bas redaktory Erkin Qydyr jáne «Qandas» medısına mamandary qaýymdastyǵynyń tóraǵasy Jeńis Qalııazymuly sóz alyp, oqyrmanǵa jol tartqan jańa jınaq týraly oı qozǵap, avtorǵa shyǵarmashylyq tabys tiledi.
