Jambyl oblysynyń ákimi Erbol Qarashókeev qatysýshylardy quttyqtap, Taraz óńiriniń sport tarıhyndaǵy erekshe ornyn atap ótti.
«Dańqty sportshy, Olımpıada chempıony Jaqsylyq Úshkempirov aǵamyz bastaǵan Jambyl óńiri kúres sheberlerine árdaıym baı ekenin dáleldep keledi. О́ńirden shyqqan sańlaq sportshylar el sportynyń tarıhyna óz esimderin altyn áriptermen jazdy. Bul – búgingi jas býyn úshin úlken ónege ári maqtanysh. Jetistikter óńirde sportty júıeli damytýǵa baǵyttalǵan eńbektiń, jattyqtyrýshylar men sportshylardyń tabandy izdenisiniń nátıjesi. Sizderge joǵary nátıjeler men ádil báseke tileımin», dedi óńir basshysy.
Qazaqstan kúres federasııasynyń prezıdenti Erkin Oqasov chempıonattyń elimizdegi kúres sportyn damytýdaǵy mańyzyn atap, jas balýandarǵa sáttilik tiledi.
«El chempıonatynyń kıeli Taraz tórinde ótýi – erekshe qýanysh. Sebebi bul óńir talaı álem jáne Olımpıada chempıondaryn tárbıelegen qasıetti meken. Balýandardyń arasynan elimizdiń namysyn abyroımen qorǵaıtyn myqty chempıondar shyǵatynyna senemin. Bul jarys – jastar úshin úlken halyqaralyq dodalardyń alǵashqy baspaldaǵy», dedi ol.
Japonııany moıyndatqan Ersin Baltaǵul balýandarǵa ádis-tásilderin kórsetti
Bıylǵy chempıonatta jas balýandarǵa aqshalaı syıaqylar qarastyrylǵan:
− U15 sanaty: chempıon – 200 myń teńge, kúmis – 100 myń teńge, qola – 50 myń teńge.
− U23 sanaty: chempıon – 500 myń teńge, ekinshi oryn – 300 myń teńge, úshinshi oryn – 150 myń teńge.
Sondaı-aq, «Qaısar rýh» jáne «Dara tásil» nomınasııalarynyń jeńimpazdary 150 myń teńgeden alady.
Chempıonattyń alǵashqy kúnderi grek-rım kúresiniń U15 sanaty boıynsha beldesýler ótti. Altyn medalǵa Bereket Ismagýlov (38 kg, Mańǵystaý oblosy), Raıymbek Jaqsylyq (41 kg, SQO), Nuraly Amangeldi (44 kg, Abaı oblysy), Rollan Kım (48 kg, Almaty qalasy), Danıal Qanatbaı (52 kg, Almaty oblysy), Aıtýǵan Osman (57 kg, Túrkistan oblysy), Sanjar Týlepov (62 kg, Almaty qalasy), Rýslan Bákir (68 kg, Jambyl oblysy), Nurtýǵan Murat (75 kg, Qaraǵandy oblysy), Eralı Muratov (85 kg, Abaı oblysy) jáne Nurmuhammed Talǵat (+85 kg, Abaı oblysy) ıe boldy.
Jalpykomandalyq esepte Túrkistan oblysy (1 altyn, 2 kúmis, 4 qola medal) 155 upaımen kósh bastady. Jambyl oblysy (1 altyn, 1 kúmis, 3 qola) – 106 upaı, Abaı oblysy (3 altyn) – 89 upaımen ekinshi jáne úshinshi oryndardy ıelendi. Upaı sany United World Wrestling erejesi boıynsha ár salmaq dárejesindegi kórsetkishten esepteldi.
Chempıonat 18 naýryzǵa deıin jalǵasyp, jas balýandardyń óneri kórermenderdi taǵy qýantady.
