Prezıdent óz sózinde memleket pen qoǵamnyń senimdi seriktestigi mańyzdy ekenin atap ótip, eriktiler qoǵamda aıryqsha ról atqaratynyn aıtty.
– Qazaqstanda 2020 jyl eriktiler jyly boldy, biraz sharýa atqaryldy. Qazir elimizdegi volonterlik uıymdar sany 3 ese ósti, ıaǵnı 680 uıym bar. Eriktilerdiń sany 200 myńǵa jetti. Barlyq aımaqta front-ofıster ashyldy. Onda myńdaǵan volonter daıyndyqtan ótti. Qazvolunteer.kz platformasy jasaldy. Iаǵnı, búgingi tańda Qazaqstanda kez kelgen adam eriktiler tobyna múshe bolyp, paıdaly iske óz úlesin qosa alady. Shyn máninde, bul – zor múmkindik. Sondaı-aq bizdiń volonterler Iordanııa, Kenııa, Taıland jáne Túrkııa elderine arnaıy baryp, tájirıbe jınaqtady. Osy tusta men Qazaqstan eriktilerine qoldaý kórsetip júrgen Birikken Ulttar Uıymynyń ókilderine alǵys aıtamyn, – dedi Qasym-Jomart Toqaev.
Prezıdent volonter bolý, eń aldymen, patrıotızmniń, ıaǵnı otanshyldyqtyń jarqyn kórinisi dep sanaıdy. Bul – adamgershilik qundylyqtaryn bárinen joǵary qoıatyn jandardyń ómir salty.
– Eriktiler ónegeli isteri arqyly qoǵamdy damytýǵa zor úles qosady. Janashyrlyq – qazaqtyń qanynda bar qasıet. Halqymyz qıyndyqqa tap bolǵan adamdardan kómegin aıamaǵan. El basyna kún týǵan qıyn-qystaý sátte «bir jeńnen qol, bir jaǵadan bas shyǵara» bilgen. Qazaqstanǵa jer aýdarylǵan talaı etnos ókilderin baýyryna basyp, baryn bólisken. Sondyqtan búgingi jıynnyń maqsaty halqymyzdyń bolmysymen úndes ekeni sózsiz, – dedi Memleket basshysy.
Prezıdent Ádiletti Qazaqstandy Adal azamattar quratynyn atap ótip, barlyq eriktilerdi Adal azamat deýge bolatynyn aıtty.
– Maǵan eriktiler men qaıyrymdy jandardyń «keń aýqymda oıla, soǵan saı áreket et» degen qaǵıdaǵa súıenip jumys isteıtini unaıdy. Shyn máninde, erteńgi jarqyn bolashaqqa jetý úshin biz búgin batyl qadamdar jasaýymyz kerek. Bul ustanym ekologııalyq mádenıet pen sanaly tutyný dástúrin qalyptastyrý úshin óte ózekti. Ol úshin adamdardyń sana-sezimi men dúnıetanymyn ózgertý kerek. Tek sonda ǵana reformalardyń nátıjesi turaqty ári máńgilik sıpatqa ıe bolady. Tulǵanyń jeke úlgi kórsetýi jáne «teń – teńimen» qaǵıdatyn ustanýy volonterliktiń negizgi qozǵaýshy kúshi dep sanaımyn. Ideıalardy belsendi túrde taratý jáne qaıyrymdylyqty nasıhattaý qoǵam damýynyń jaýapty azamat jáne patrıotızm uǵymdaryna negizdelgen jańa paradıgmalaryn qalyptastyrýǵa yqpal etedi. Osy sebepti elimizde volonterlik qozǵalystyń damýyn ilgeriletý úshin barynsha jaǵdaı jasalady, – dedi Memleket basshysy.
Prezıdenttiń aıtýynsha, Qazaqstanda 2021-2023 jyldarǵa arnalǵan Volonterlikti damytý jol kartasy aıasynda birqatar joba tabysty iske asyryldy. Memleket basshysy qoǵamda eriktilik men qaıyrymdylyq dástúrin nyǵaıtý úshin birneshe keshendi shara qabyldaýdy usyndy.
– Osy saladaǵy strategııalyq baǵyttardy naqty kórsetetin jańa Jol kartasyn ázirleý kerek. Atalǵan qujat volonterlik qozǵalysqa tyń serpin berip, onyń taıaý jyldardaǵy damýynyń basty baǵyttaryn aıqyndaýǵa tıis. Ekinshiden, eriktilik men qaıyrymdylyq isin esepke alatyn júıeni kezeń-kezeńimen engizý qajet. Bul bastama volonterlik qozǵalysty yntalandyrý úshin zańnamalyq deńgeıde tıimdi sharalar qabyldaýǵa múmkindik beredi. Úshinshiden, volonterlik qozǵalysty uzaqmerzimdi grant berý arqyly yntalandyrý kerek. Bul rette memlekettik jáne jekemenshik grant berýshiler arasynda turaqty seriktestik ornatyp, otandyq jáne halyqaralyq donorlardyń bir-birimen nátıjeli yntymaqtastyǵyn qalyptastyrý mańyzdy. Tórtinshiden, volonterlik jáne qaıyrymdylyq isterdi ınstıtýttyq turǵyda qoldaý ınfraqurylymyn dáıekti túrde damytqan jón. Ol úshin volonterlerdiń ulttyq jáne aımaqtyq deńgeıdegi front-ofısiniń uıymdastyrýshylyq, tehnıkalyq jáne kadrlyq áleýetin kúsheıtý qajet. Besinshiden, volonterlik qyzmet salasyndaǵy halyqaralyq yntymaqtastyqty odan ári nyǵaıtýǵa jáne ilgeriletýge erekshe nazar aýdarý qajet, – dedi Qasym-Jomart Toqaev.
Sóziniń sońynda Prezıdent atalǵan forým bul baǵyttaǵy ortaq jumys ózekti ári óte qajet ekenin jáne elimizdegi volonterlik qozǵalysty damytýǵa tyń serpin beretinin atap ótti.
BUU Bas hatshysy Antonıý Gýterrıshtiń forým qatysýshylaryna úndeýin uıymnyń Qazaqstandaǵy turaqty úılestirýshisi Mıkaela Frıberg-Storı oqyp berdi. Sondaı-aq jıynda BUU Eriktiler baǵdarlamasynyń atqarýshy úılestirýshisi Toılı Kýrbanov, BAÁ Toleranttylyq jáne beıbit qatar ómir súrý mınıstrliginiń bas dırektory Afra Muhammed Ál Sabrı, Túrkııanyń belgili mádenıet qaıratkeri Halýk Levent jáne basqa da spıkerler sóz sóıledi.
