Jıynǵa Parlament depýtattary, mınıstrlik ókilderi, ǵalymdar men jazýshylar qatysty. Kezdesýde Qazaqstannyń óńirlerindegi 18 oqý ornyn jáne Kókshetaý, Qosshy, Stepnogorsk (Aqmola oblysy) Arys (Túrkistan oblysy) jáne Taldyqorǵan (Jetisý oblysy) qalalaryndaǵy 69 kósheni qaıta ataý máselesi talqylandy.
Otyrys qorytyndysy boıynsha Ońtústik Qazaqstan pedagogıkalyq ýnıversıtetine kórnekti memleket jáne qoǵam qaıratkeri, ǵalym-etnograf, tarıhshy, akademık О́zbekáli Jánibekovtiń esimin berý týraly sheshim qabyldandy.
Aqtaý qalasyndaǵy №28 jalpy bilim beretin mektepke Uly aǵartýshy, ǵalym, aqyn jáne pýblısıst Ahmet Baıtursynulynyń esimi berildi. «Ult ustazynyń» esimimen Qostanaı aýdanynyń bilim bóliminiń memlekettik tilde oqytatyn Zarechnaıa jalpy bilim beretin mektebi, sondaı-aq Jetisý oblysy Alakól aýdanynyń Úsharal qalasynyń №1 orta mektebi atalady. Jetisý oblysy Alakól aýdany Beskól stansııasynyń № 14 orta mektebi álemge áıgili qazaq jazýshysy Muhtar Áýezovtiń qurmetine ózgertiledi.
Sondaı-aq Túrkistan oblysynyń Arys qalasynda Roza Baǵlanovanyń, Qazaqstannyń Halyq jazýshysy Sherhan Murtazanyń jáne ártúrli geografııalyq oryndardyń: Sharyn, Saryarqa, Ulytaý, Jıdebaı, Saraıshyq jáne t. b. atyndaǵy kósheler paıda bolady.
«Gúlder», «Asý», «Tirshilik» jáne «Aınalaıyn» syndy ataýlardyń bir bóligi qaıta qaraýǵa baǵyttaldy. Otyrysqa qatysýshylar kóshe ataýlary óńirdiń tarıhı jáne geografııalyq erekshelikterin kórsetip, naqty maǵynaǵa ıe bolýy kerek degen pikirge keldi.
«Jaqynda Túrkistanda ótken Ulttyq Quryltaıdyń II otyrysynda Memleket basshysy Qasym-Jomart Toqaev ómirbaıany bireýdiń jeke múddesi men qalaýy úshin maqsatty túrde mıfologııalanǵan keńestik kezeńdegi qaıratkerlerdiń esimderin ártúrli nysandarǵa berý tájirıbesin toqtatý kerektigin aıtty. Prezıdent onomastıka salasynda tártip ornatýdy jáne óńirlik erekshelikterdi de, jalpyulttyq basymdyqtardy da eskere otyryp, barlyq rásimderdi reglamentteýdi tapsyrǵan bolatyn. Dál osy maqsatta Mádenıet jáne sport mınıstrligi kórnekti qaıratkerler men tarıhı tulǵalardyń «Tarıhı tulǵalar» tizimin ózektendirý boıynsha jumys júrgizýde, sonyń negizinde nysandar men kóshelerge jańa ataýlar beriledi», dedi Ashat Oralov.
Qazirgi ýaqytta komıssııaǵa 681 usynys tústi. Olardy jergilikti onomastıkalyq komıssııalardyń qaraýyna ákimdikterge jiberý týraly sheshim qabyldandy.
