Is-sharada, eń aldymen, elimizdiń áleýmettik-ekonomıkalyq damýyna qatysty negizgi syn-qaterler talqylandy. Júrgizilgen taldaý nátıjeleri jóninde Strategııalyq josparlaý jáne reformalar agenttiginiń tóraǵasy Áset Erǵalıev baıandama jasady.
Prezıdent baıandamany tyńdaǵan soń saıası reformalarmen qatar ekonomıkalyq jáne quqyqtyq ózgerister de júzege asyrylýy qajet ekenin atap ótti. Úkimet pen Strategııalyq josparlaý jáne reformalar agenttigine Qazaqstannyń 2029 jylǵa deıingi Ulttyq damý josparyn ázirleý barysynda búgingi talqylaýdyń nátıjelerin eskerý jóninde tapsyrma berildi.
Jıyn barysynda energetıka salasy men tıimdi tarıf saıasatyn damytý jónindegi sharalarǵa basa mán berildi. Bul baǵyttaǵy atqarylyp jatqan jumystar jóninde Energetıka mınıstri Almasadam Sátqalıev jáne Ulttyq ekonomıka mınıstri Álibek Qýantyrov baıandady. Memleket basshysy «Tarıfti ınvestısııalarǵa aıyrbastaý» baǵdarlamasyn tıimdi ári ýaqytyly júzege asyrý Úkimettiń basty mindeti ekenin eskerdi.
Prezıdent jylý energetıkasy jáne energııa júıesiniń nysandary bilikti kadrlarmen qamtamasyz etilmegenin kelesi ózekti másele retinde atap ótti. Kadr tapshylyǵy máselesin jedel sheshý jóninde tapsyrma berildi.
Jıynda ulttyq jobalardy ázirleý máselesi de qarastyryldy. Qasym-Jomart Toqaev «Jaıly mektep» jáne «Aýyldyq densaýlyq saqtaýdy jańǵyrtý» ulttyq jobalaryn ýaqytyly ári sapaly júzege asyrý qajettigine nazar aýdardy.
«Qoljetimdi ınternet» jańa ulttyq jobasy týraly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın baıandady. Memleket basshysy mınıstrdiń baıandamasyn tyńdap, atalǵan ulttyq joba halyqty qoljetimdi jáne sapaly ınternetpen qamtamasyz etý kerek ekenin basa aıtty.
