Memleket basshysynyń tapsyrmasy boıynsha elimizdiń barlyq memlekettik jáne qoǵamdyq ınstıtýttarynyń, sondaı-aq halyqaralyq sarapshylardyń qatysýymen ázirlenip jatqan Qoǵamdyq qaýipsizdikti qoǵammen seriktestikte qamtamasyz etý tujyrymdamasy talqylanǵan jıynǵa Prezıdent Ákimshiliginiń qyzmetkerleri Úkimet músheleri, Parlament depýtattary, memlekettik, jergilikti atqarýshy organdar, dıplomatııalyq mıssııalar ókilderi, sarapshylar, sondaı-aq ǵylymı qoǵamdastyq ókilderi qatysty.
Memlekettik organdardyń, polısııa men qoǵamnyń syndarly yntymaqtastyǵy negizinde quqyq buzýshylyqtardyń aldyn alýdyń tıimdi júıesin qurý tásilderin talqyǵa salǵan forýmdy Ishki ister mınıstri Marat Ahmetjanov ashyp, Memleket basshysy servıstik modelge kóshý barysynda qylmysqa qarsy kúrestiń ǵana emes, azamattardyń qaýipsizdigin arttyrýdyń da mańyzdylyǵyn atap ótkenin aıtty. Osy tapsyrmany iske asyrý úshin IIM quqyq buzýshylyqtardyń aldyn alýdyń keshendi júıesin qurýdyń irgetasy bolatyn tujyrymdama jobasyn ázirledi. Marat Ahmetjanov quqyq buzýshylyqty boldyrmaý úshin negizgi bes qaǵıdany atady.
– Birinshisi – seriktestik jáne ortaq jaýapkershilik. Qazirgi zamanǵy qoǵamdyq qaýipsizdikke tónetin syn-qaterlerge tek birge qarsy turýǵa bolady. Ekinshisi – qylmysqa ákeletin sebepter men jaǵdaılardy joıý. Oryn alǵan jaǵdaılarǵa jaýap berý jalǵyz modus operandi (ádettegi áreket tásili) bolmaýy kerek. Qylmystyń sebepteri men jaǵdaılaryn anyqtaý jáne problemalardy sheshý úlken birlesken kúsh-jigerdi qajet etedi. Úshinshisi – qylmystyq sot tóreliginiń tıimdiligi. Polısııa, prokýratýra jáne sottar jumysyndaǵy ádilettilikke basa nazar aýdarý kerek. Adamdar bul úderiske senip, ony ádil dep sanasa, olar quqyq qorǵaý organdarynyń zańdary men sheshimderin saqtaýǵa beıim. Tórtinshi – quqyq buzýshylyq qurbandaryn keshendi qorǵaý. Bul qylmystardyń zııanyn azaıtýǵa yqpal etedi jáne qaıtadan qurbandyqqa túsýden saqtaıdy. Besinshisi – saraptaý men quzyrettiliktiń jańa deńgeıin jasaýymyz qajet, – dedi mınıstr.
Jıynda sóz alǵan Prezıdent Ákimshiligi basshysynyń birinshi orynbasary Tımýr Súleımenov IIM tarapynan daıyndalǵan tujyrymdamanyń mańyzyn atap ótip, ony júzege asyrý tek polısııanyń ǵana mindeti emes ekenin jetkizdi. «Bul mindetti Ishki ister mınıstrligi jeke-dara sheshe almaıdy. Oǵan qoǵam bolyp jumylý kerek. Mınıstrlik osy baǵyttaǵy jumystardy úılestirýshi retinde qyzmet etedi. Al problemalardy sheshýge barlyq memlekettik organdar, azamattyq qoǵam atsalysýy kerek», dedi ol.
Sondaı-aq forýmda Bas prokýror Berik Asylov, Májilis tóraǵasynyń orynbasary Danııa Espaeva, AQSh-tyń Qazaqstan Respýblıkasyndaǵy elshisi Danıel Rozenblým da sóz alyp, oı-pikirlerin ortaǵa saldy. Aıta keteıik, bul forým elimizdegi AQSh elshiliginiń qoldaýymen ótkizildi. Ishki ister mınıstri Marat Ahmetjanov mańyzdy qujatty talqylaýǵa arnalǵan jıynnyń ótýine atsalysqan elshilik ujymyna alǵysyn bildirdi.
«Búgin áńgime arqaýyna aınalyp otyrǵan tujyrymdama – óte mańyzdy bastama. Ol barlyq múddeli taraptardyń ózara áriptestigi negizinde júzege aspaq. Polısııa men qoǵam arasyndaǵy tyǵyz baılanys, olardyń ózara senimdilik tanytýy tek Qazaqstan úshin emes, AQSh úshin de asa mańyzdy. Eger polısııa halyq aldynda senimin joǵaltsa, bul óz zalalyn tıgizedi. Quqyq qorǵaý organdary men qoǵam arasyndaǵy senimdi nyǵaıtý polısııanyń halyqty qorǵaý tıimdiligin arttyrady», dedi Danıel Rozenblým.
Forým aıasynda «Quqyq buzýshylyqtyń aldyn alý jónindegi strategııalyq paıym», «Halyqaralyq standarttar jáne úzdik tájirıbeler» jáne talqylaý sessııalary ótip, Ishki ister mınıstriniń orynbasary Igor Lepeha, Ákimshilik polısııa komıteti, Kadr saıasaty departamentiniń basshylary, sondaı-aq otandyq jáne sheteldik sarapshylar sóz sóıledi. Olar vedomstvoaralyq ózara is-qımyl jáne áriptestik, polısııanyń jumysyn jetildirý máselelerin talqyǵa saldy. Sheteldik sarapshylar qylmystyń aldyn alýdyń álemdik standarttary, halyqpen áriptestiktiń praktıkalyq tásilderi, sondaı-aq turmystyq zorlyq-zombylyqtyń aldyn alý men olarǵa kómek kórsetýdiń zamanaýı tásilderi, táýekelderdi baǵalaý jáne basqarý júıesi týraly aıtyp berdi. Tujyrymdamany iske asyrý quqyq buzýshylyqtardyń aldyn alýdyń tıimdi júıesin qurýǵa jáne ádiletti Qazaqstandy turaqty damytatyn berik irgetas qalyptastyrýǵa múmkindik beretini atap ótildi.
