27 maýsymda QR Prezıdentiniń janyndaǵy Memlekettik basqarý akademııasynda JTN BR18574203 «Memlekettik qyzmetti damytý prosesterin ǵylymı-ádisnamalyq negizdeý jáne Jańa Qazaqstandy qurý aıasynda memlekettik organdardyń qyzmetin transformasııalaý» baǵdarlamasyn iske asyrý aıasynda dóńgelek ústel ótti. Sharaǵa ortalyq memlekettik organdar men jergilikti atqarýshy organdardyń, ÚEU-niń ókilderi, memlekettik basqarý salasyndaǵy sarapshylar qatysty.
Akademııa rektory Erlan Ábildiń aıtýynsha, dóńgelek ústel Qazaqstan Respýblıkasynyń memlekettik qyzmetin damytý tásilderin talqylaý jáne memlekettik organdarǵa analıtıkalyq jazbalar daıyndaý maqsatynda uıymdastyrylǵan.
Is-sharada zertteý tobynyń múshesi, memlekettik jáne jergilikti basqarý salasyndaǵy PhD, SPHRi Aıgerim Amırova Memlekettik qyzmet júıesin jetildirý jáne memlekettik organdar jumysyn transformasııalaý úzdiksiz prosess ekenin eskerdi. Onyń aıtýynsha, bes jyl buryn halyqaralyq uıymdar Qazaqstannyń memlekettik qyzmetin keshendi baǵalaýdy júrgizgen. Qazir memlekettik qyzmet júıesin odan ári damytý baǵdarlaryn aıqyndaý úshin júrgizilgen reformalardy sapaly, jan-jaqty baǵalaý qajettiligi týyndap otyr.
«Álemdik tájirıbe boıynsha búgingi tańda memlekettik sektordy damytýdyń úsh negizgi baǵyty bar. Memlekettik qyzmet halyq arasynda tartymdy bolýy úshin talanttardy basqarý, irikteý rásimderiniń ashyqtyǵyn qamtamasyz etý, ishki korporatıvtik mádenıet boıynsha jumystar júıeli túrde júrgizilip jatyr. Ekinshi baǵyt – memlekettik apparattyń matrısalyq (ıkemdi) qurylymdary. Oǵan jobalyq basqarý, strategııalyq HR menedjment, Memlekettik qyzmet salasyndaǵy ýákiletti organnyń memlekettik organdardyń qyzmetin transformasııalaý jáne ınnovasııalyq sheshimderdi engizý máselelerindegi proaktıvti rólin jatqyzýǵa bolady. Úshinshi baǵyt – sıfrlandyrýǵa, onyń ishinde jasandy ıntellekt múmkindikterin paıdalanýǵa negizdelgen «kórinbeıtin belsendi memlekettik basqarý», dedi ol.
Zertteý tobynyń jetekshisi, PhD doktory, Akademııa professory Baýyrjan Boqaev dóńgelek ústel aıasynda birqatar áleýmettik, statıstıkalyq jáne ekonomıkalyq taldaý quraldaryn qoldana otyryp, QR memlekettik qyzmetiniń jaı-kúıine keshendi zertteý júrgizilgenin atap ótti. Onyń aıtýynsha, memlekettik qyzmetti reformalaýdy jáne olardyń qazaqstandyq qoǵamdaǵy áleýmettik mártebesin qabyldaý boıynsha 11 myńnan astam memlekettik qyzmetshiniń arasynda júrgizilgen saýalnama nátıjesi memlekettik qyzmettegi jumystyń negizgi sebebi «eline paıdasyn tıgizý» ekenin kórsetken. Áleýmettik saýalnamaǵa sáıkes, memlekettik qyzmetshilerdiń 42%-y memlekettik qyzmette jumys isteýdiń negizgi faktoryn atap ótti, 26%-y «qarjylyq turaqtylyqty» jáne 14%-y «kásibı tájirıbe jınaýdy» memlekettik qyzmette jumys isteýdiń mańyzdy sebepteri retinde atap ótken.
Sonymen qatar Memlekettik basqarý akademııasy Qoldanbaly zertteýler ınstıtýtynyń bas ǵylymı qyzmetkeri Dastan Kósherbaev dóńgelek ústel barysynda «Memlekettik organdardyń qyzmetine áleýmettik (qoǵamdyq) baqylaýdyń tıimdiligi: baǵalaý krıterıılerin tańdaý týraly máseleler» taqyrybynda baıandama jasady. Saıasattaný ǵylymdarynyń kandıdaty qoǵamdyq keńes qyzmeti qoǵamda jáne sheshim qabyldaý prosesinde halyq arasynda memlekettik organdarǵa degen senimniń ósýine yqpal etetinin eskerdi.
Sarapshylardyń oıynsha, memlekettik qyzmetshiler arasyndaǵy saýalnama nátıjeleri, sondaı-aq akademııalyq orta, ÚEU, kvazımemlekettik sektor sarapshylarymen suhbat, eldik keıster men halyqaralyq uıymdardyń usynymdaryn zerdeleı otyryp, memlekettik qyzmetti odan ári damytýdyń ǵylymı-dáleldi (evidence based) baǵdarlaryn ázirleýge múmkindik beredi.
