Depýtattyń aıtýynsha, Qazaqstan sońǵy birneshe jylda eldiń qorǵanys qabileti men ulttyq qaýipsizdigin kúsheıtý maqsatynda aıtarlyqtaı jumys júrgizdi. Sonymen qatar pysyqtaýdy jáne sheshýdi talap etetin máseleler de bar. Kóptegen memlekettik organdarda jumyldyrý qurylymyn mınıstrdiń orynbasarlary, orynbasarlar, apparat basshylary qadaǵalaıdy. Alaıda, jumyldyrý daıyndyǵy týraly zańǵa sáıkes mundaı bólimsheler memlekettik organnyń birinshi basshysyna tikeleı baǵynýǵa tıis. Sonymen qatar bul salada bilikti mamandardyń múldem jetispeıtini anyqtaldy.
«Jumyldyrý josparynda memlekettik organdarǵa beriletin jumyldyrý mindeti men jumyldyrý tapsyrysy belgilengen. Alaıda, olarda óndiristik, qarjylaı, qoıma múmkindikteri árdaıym bola bermeıdi. Sondyqtan jospar jasaýdan buryn uıymnyń materıaldyq-tehnıkalyq jáne qarjylaı múmkindikterine taldaý jasaý qajet. Memlekettik organdar Memmatrezervtiń materıaldyq qundylyqtaryn saqtaý nomenklatýrasy men kólemin qalyptastyrýǵa múddeli emes. Sondyqtan olar qajettilikterdiń aýqymdy tizimin beredi. Ony jumyldyrý rezervine tolyq engizý múmkin emes. Tótenshe jaǵdaılar mınıstrligi úshin bólinetin lımıtter men bıýdjet qarjysy jumyldyrý rezervin qamtamasyz etýdiń qajetti deńgeıine jetpeıdi. Sondyqtan jumyldyrý rezervine materıaldyq qundylyqtardy satyp alýdyń basymdyǵy kúshin joıady jáne rezervti jınaqtaýdyń jalpy paıyzy belgilengen kólemge jetpeıdi», dedi Janna Asanova.
Senator osyǵan baılanysty jumyldyrý rezerviniń materıaldyq qundylyqtaryn qalyptastyrý, saqtaý jónindegi fýnksııalardy memlekettik organdarǵa berýdi usyndy. Sondaı-aq árbir memlekettik organǵa jumyldyrý tapsyrysyn oryndaý úshin qajetti taýarlardyń ataýy men kólemin aıqyndaý jónindegi esepteý normatıvterin ázirleý jáne bekitý quzyretteri bekitilýi tıis ekenin jetkizdi.
