«Men úshin kútpegen jaǵdaı boldy. Sebebi osyndaı bedeldi ýnıversıtetter bakalavrıattan doktorantýraǵa sırek qabyldaıdy. О́mirimde bir jaqsy jaǵdaı oryn alsa, birden mektebim esime túsedi. Zııatkerlik mektepte alǵan bilimim maǵan áli de jańa múmkindikter syılap keledi», deıdi aqtóbelik zııatker.
Oljas Esenbaevtyń tańdaýy – Nıý-Iorktegi Kornell ýnıversıteti. Bul joǵary oqý orny Aıvı lıgasyna kiredi, álemdegi úzdik 20 ýnıversıtettiń qatarynda tur. Jyl saıynǵy qabyldaý kórsetkishi 6,9 paıyzdy quraıdy.
Oljas bıyl «Bıomedısınalyq ınjenerııa» baǵdarlamasy boıynsha Koreıadaǵy UNIST ýnıversıtetin «Adam faktorlary ınjenerııasy» mamandyǵy boıynsha tereńdetip bitirdi. Onyń bolashaq mamandyǵy «Aqparattyq ǵylymdar» dep atalady. Bul adam boıyndaǵy kúızelis, úreı, keıde tipti nashaqorlyq belgileriniń paıda bolýyn aldyn ala boljaýǵa baǵyttalǵan. Bul rette Kornell ýnıversıteti stýdentterine ǵylymı jumystarmen aınalysýǵa mol múmkindik usynady. Oljas psıhıkalyq jáne fızıkalyq aýrýlardy taný úshin mobıldi sensorlardy jáne mashınalyq oqytýdy qoldanýdy zertteıtin zerthanada oqyp, izdenýdi josparlap otyr. Onyń izdenimpazdyǵy men belsendiligin, sondaı-aq beıneleý ónerine degen erekshe qyzyǵýshylyǵyn mekteptegi ustazdary da atap ótti.
«Oljas álemdegi jahandyq máselelerdi sheshýge úles qosýǵa bala kezinen umtyldy. Ol ózin talantty sýretshi jáne ıllıýstrator retinde kórsetip, zııatkerlik mektep oqýshysy Araılym Seıtenova aýdarǵan qazaq tilindegi Garrı Potter týraly alǵashqy kitapqa da sýretter salǵan. Oljastyń komıksteri men ıllıýstrasııalary mektep qaýymdastyǵynyń áli de esinde. Ol salǵan kartınalar NIS ART festıvaldarynda úzdik atanyp, búginde zııatkerlik mekteptiń sánin keltirip tur, – dep atap ótti Aqtóbedegi zııatkerlik mektep dırektorynyń orynbasary Aıgúl Asanova.
