Sýretti túsirgen Talǵatjan Muhametbekuly
Torańǵynyń ózge ósimdikterden ereksheligi, bir butaǵynyń ózindegi japyraqtary eki túrli. Aǵash dińi qoıý qońyr. Ásirese shóleıtti aýmaqtarda ósedi. Shyǵys Qazaqstan boıynsha Kúrshim óńirinde ǵana bar. Onyń ózinde sanaýly.
«Burynǵy zamanda bul aǵashta qasıet bar desetin. Kesýge de tyıym salǵan. Bizdiń jaqtyń torańǵysy osy tusta ǵana ósedi», deıdi B.Sherbakov Zaısan kóliniń jaǵalaýyndaǵy ár-ár jerden shyqqan taldardy nusqap.
Jalpy, Qazaqstan aýmaǵynda torańǵynyń 3 túri ósedi: qara torańǵy, aq torańǵy jáne Lıtvınov torańǵysy. Ásirese Aral, Balqash, Alakól mańyndaǵy qumdaýyt oıystarǵa bitken. Túrleri qysqa butaqtardaǵy japyraqtarynyń pishinine qaraı ajyratylady eken. Gúldeý merziminde tikireıe shyǵyp, keıin tómenge ıiledi. Iá, bul aǵash ta jemis beredi. Qaýashaqtary bótelke tárizdi. Tuqymy jelmen tez taralǵanymen, baıaý ósedi. Keıbir kári torańǵylardyń bıiktigi – 30 metrge deıin barsa, dińiniń dıametri – eki metrdeı.
Jergilikti turǵyndardyń aıtýynsha, ala jazdaı bul jerge alys-jaqyn shetelderden qonaqtar kelip, shatyr tigetin kórinedi. Qona jatyp, kúnniń shyqqanyn kútedi, fotosýretter túsiredi. Beıne bir Tanzanııanyń savannasyndaı jer. Ánekeı, erekshe jerimizge el qyzyǵady. Aldaǵy kúnderi Zaısannyń jaǵalaýyndaǵy torańǵyly betkeıdi týrıstik aýmaqqa aınaldyrýǵa ábden bolady.
Shyǵys Qazaqstan oblysy,
Kúrshim aýdany
