«Ornyqty damý salasyndaǵy BUU maqsattarynyń biri qalany damytýǵa arnalǵan. Bul kezdeısoq emes. Qazaqstanda biz osy baǵytqa erekshe nazar aýdaramyz. Álemniń jyldam damyp kele jatqan astanalarynyń qataryna kiretin elordamyz basqa qalalardyń damýyna úlgi bolady. О́tken shırek ǵasyrda elimizdiń bas qalasynyń aýmaǵy 3 ese ulǵaıyp, halqynyń sany 4 ese ósti.
Sarapshylardyń boljamy boıynsha elorda turǵyndarynyń sany 2030 jylǵa qaraı 2 mıllıonǵa jetedi. El astanasy mártebesine ıe bolǵan sátten beri qalanyń ekonomıkalyq áleýeti 100 eseden astam artty. Qazir qala ekonomıkasy eldegi jalpy ishki ónimniń 10 paıyzdan astamyn quraıdy», dedi Memleket basshysy.
Sonymen qatar Memleket basshysy úlken kórsetkishter qalanyń úılesimdi damýymen únemi sáıkes kele bermeıtinin eskerdi. Prezıdenttiń oıynsha megapolısterdiń tabysty bolýynyń basty kórsetkishi onyń turǵyndarynyń turmys sapasymen ólshenýge tıis. Sondyqtan elordany damytý jáne abattandyrý kezinde Qasym-Jomart Toqaev «adam qala úshin emes, qala adam úshin» qaǵıdatyn basshylyqqa alatyndyǵyn aıtty.
«Adamǵa baǵdarlanǵan mundaı ustanym múlde basqa strategııalyq maqsatty kózdeıdi. Qala ákimdigi, eń aldymen, turǵyndardyń múddesi men qajetin basshylyqqa alady. Astananyń barsha turǵyny men qonaqtary úshin qalada barynsha qolaıly orta qalyptastyrý – asa mańyzdy másele. Biz bárine teń múmkindik beriletin qoǵam qurý jolyn tańdadyq jáne osy baǵytta damyp kelemiz. Sondyqtan ózara jaýapkershilik pen azamattyq yntymaqtastyqqa negizdelgen ınklıýzıvti damýǵa aıryqsha mán beremiz», dedi Prezıdent.
