Qasym-Jomart Toqaev eki el arasyndaǵy tyǵyz qarym-qatynas dostyq pen yntymaqtastyq rýhynda damyp kele jatqanyn atap ótti.
Memleket basshysy Shveısarııanyń Almatydaǵy Qurmetti konsýldyǵy qyzmetiniń bastalýymen quttyqtady. Onyń resmı ashylý rásimine Inıasıo Kassıs qatysty.
Memleket basshysy Shveısarııa Qazaqstannyń Eýropadaǵy negizgi saıası, saýda jáne ekonomıkalyq seriktesteriniń biri ekenin aıtty. Qazirgi ýaqytta Shveısarııa Qazaqstannyń jetekshi 20 saýda seriktesiniń qataryna kiredi. Elimizge jalpy kólemi 32,5 mıllıard dollardan astam ınvestısııa quıǵan úsh iri ınvestordyń biri.
«Biz Qazaqstan ekonomıkasynyń perspektıvti salalaryna ınvestısııa quıýǵa daıyn jańa shveısarııalyq kompanııalardy qoldaımyz. Qazaqstan Úkimeti men Stadler temirjol konserni arasynda qol qoıylǵan kelisimniń keleshegi zor dep oılaımyn. Sondyqtan osy mámileniń júzege asyrylý barysyn erekshe qadaǵalaımyz. Bul bizdiń qarym-qatynasymyzdyń damýyna tyń serpin beredi», dedi Qasym-Jomart Toqaev.
Memleket basshysy Shveısarııa Konfederasııasynyń Prezıdenti Alen Bersege izgi tilegin joldady.
Inıasıo Kassıs ekijaqty yntymaqtastyqtyń qazirgi damý deńgeıine oń baǵa berip, ony nyǵaıtý isine atsalysýǵa daıyn ekenin jetkizdi.
Shveısarııanyń Syrtqy ister mınıstri elimizde júrgizilip jatqan aýqymdy reformalardy joǵary baǵalady.
«Ekijaqty saýda men ınvestısııa tyǵyz baılanystarymyzdyń mańyzdy baǵyty sanalady. О́zińiz aıtqandaı, eger Shveısarııanyń jeke kompanııalary sizdiń elińizge ınvestısııa quısa, bul reformalaryńyzdyń tabysty júzege asýyna, sondaı-aq qarjy salý úshin jasalatyn jaǵdaıdyń jaqsarýyna yqpal etedi», dedi mınıstr.
Áńgimelesý barysynda óńdeý ónerkásibi, saýda jáne logıstıka, mashına jasaý, aýyl sharýashylyǵy, qarjy qyzmetteri, sıfrlandyrý, bilim berý salalarynda birlesken ınvestısııalyq jobalardy iske asyrýǵa erekshe nazar aýdaryldy.
Sonymen qatar kezdesýde halyqaralyq jáne óńirlik kún tártibindegi ózekti máseleler qarastyryldy.
