Májilis depýtaty Baqtyqoja Izmuhambetov «Embimunaıgaz» AQ ujymymen kezdesip, zań shyǵarýshy organnyń jumysy men qabyldanyp jatqan zańdar týraly aqparat berdi. Jıynda depýtat onlaın jarnama, shetelge shyǵarylǵan aktıvterdi elge qaıtarý týraly zańdardyń talaptary men tıimdiligi týraly aıtyp, «AMANAT» partııasynyń jobalaryna da toqtaldy. Sonyń ishinde «Aýyl amanaty» jobasynyń maqsat-mindetterine nazar aýdardy.
«Prezıdentimiz Qasym-Jomart Toqaevtyń bastamasymen Ádiletti Qazaqstan qurý jolynda biraz sharýa atqarylyp jatyr. Osyǵan oraı Parlamentte, Úkimette ıgi ister qolǵa alyndy. Biz óńirlerde ózekti túıtkilder týyndap jatqanyn jaqsy bilemiz. Respýblıkalyq deńgeıde sheshiletin máselelerdi Úkimetke jetkizetin bolamyz», dedi Baqtyqoja Izmuhambetov.
Al Májilis depýtattary Dúısenbaı Turǵanov pen Ádil Jubanov osy óńirdegi iri munaı-gaz mekemeleriniń ujymdarymen kezdesti. Jıynǵa «Embimunaıgaz» AQ, «Teńizshevroıl» JShS jáne North Caspian Operating Company N.V. kompanııasynyń ókilderi qatysty. Onda áleýmettik ınfraqurylymdyq jobalar jáne kógaldandyrý taqyryptary qozǵaldy.
Qazirgi tańda depýtattardyń atsalysýymen «Teńizshevroıl» kompanııasy merdiger kompanııalarmen Teńizdegi aýysymdyq jumys kestesin 28 kúnnen 14 kúnge ózgertý baǵytynda kelissózder júrgizýde.
Sonymen qatar Teńiz kenishine jumysqa jańadan qabyldanatyn azamattardyń ózderine jumys aýysymynyń ýaqytyn, ıaǵnı 28 kúndik nemese 14 kúndik vahtalyq ádisti tańdaýyna múmkindik beriletin bolady. Bul másele tolyq sheshilgenge deıin Májilis depýtattarynyń tikeleı baqylaýynda bolady.
Kezdesý barysynda «Teńizshevroıl» kompanııasymen iske asyrylyp otyrǵan «Igilik» baǵdarlamasynyń jyldyq bıýdjetin kóbeıtý jáne qurylystardy sapaly júrgizý máselesi kóterildi.
Sondaı-aq depýtattar «Teńizshevroıl» kompanııasyn Jylyoı aýdanyn kógaldandyrý máselelesin tezdetýge shaqyrdy.
2021 jyly oblystyq ákimdikpen jasaqtalǵan memorandým talaptaryna sáıkes, «Teńizshevroıl» mekemesi josparlanǵan 647 ga jerdiń 2022 jyly 15 ga jerine 9000 dana aǵash kóshetterin otyrǵyzyp, jospardyń 2,3%-yn ǵana oryndaǵan.
