Ortalyqtyń negizgi mindetteriniń biri – memleket pen azamattardyń ózara is-qımylynyń jańa ortasyn qalyptastyrý. Al onyń jumysynyń negizgi qaǵıdattary – klıentke baǵdarlaný, ótinish berýshilerge kórsetiletin qyzmet sapasyn arttyrý jáne jalpy osy salaǵa jańa standarttardy engizý. 
Ortalyq bazasynda kelýshiler ózderine yńǵaıly jaǵdaıda kez kelgen memlekettik organǵa ótinishin bere alady, sondaı-aq HQKO-ǵa uqsas túrli vedomstvolar ókilderinen, medıatorlar jáne zań mamandarynan keńes ala alady. Sonymen qatar munda azamattar memlekettik organdardyń birinshi basshylarynyń jeke qabyldaýyna jazylý múmkindigine ıe bolady.
Ortalyq alańynda apta saıyn 18 mınıstrliktiń ókilderi azamattardy jeke qabyldaıdy, keste Úkimet saıtynda aldyn ala jarııalanatyn bolady. Bul rette óńirlerdiń turǵyndaryna elordaǵa arnaıy kelýdiń qajeti joq, óıtkeni olardy onlaın-formatta da qabyldaý júrgiziledi.
Ortalyqtyń qurylýy el Prezıdenti Qasym-Jomart Toqaevtyń bastamasymen qolǵa alynǵan «Halyq únine qulaq asatyn memleket» tujyrymdamasyn júzege asyrý jónindegi aýqymdy jumystyń jalǵasy ekenin aıta ketken jón. Buǵan deıin bul úderis sheńberinde ótinish berýshiler quqyqtarynyń basymdyǵyn qamtamasyz etetin jáne ótinishterdi qaraý kezinde memlekettik organdardyń jaýapkershiligin kúsheıtýdi kózdeıtin Ákimshilik rásimdik-prosestik kodeksi qoldanysqa engizilgen bolatyn. Odan keıin óńirlerde ótinishterdiń qaralýyn baqylaý boıynsha bólimder jumys isteı bastady, ákimshilik sottar júıesi qurylyp, eOtinish biryńǵaı aqparattyq júıesi jáne t. b. iske qosyldy.
Jańa Ortalyqtyń bazasynda sıfrlyq HQKO iske qosyldy, ol arqyly onlaın rejıminde 1220 memlekettik qyzmet túrin alýǵa bolady.
Ortalyqta QR ákimshilik quqyq buzýshylyq týraly zańnamasynda, qylmystyq is júrgizý nemese azamattyq is júrgizý zańnamasynda qaraý tártibi belgilengen ótinishter qabyldanbaıtynyn atap ótken jón. Bul máseleler boıynsha azamattar tıisti quqyq qorǵaý nemese sot organdarynyń front-ofısterine júginýi tıis.
Tutastaı alǵanda, keshendi tásil jańa Ortalyqty memlekettik organdar men úkimettik emes uıymdardyń jáne jurtshylyqtyń eń ózekti máseleler tóńiregindegi ózara is-qımyly jolǵa qoıylǵan ári suranysqa ıe dıalog alańyna aınaldyrady dep kútilýde.
