Bes jyldan beri Belgııada turyp jatqan almatylyq qazaq Saǵynǵalı Mamaı Brıýsseldegi joǵarǵy tehnologııa mektebinde bilim alyp, sol jerde toqyma ónerkásibi salasynda jumys istepti.
Qazaqstan ulttyq arnasy habarlaǵandaı, bir ózi kári qurlyqtaǵy aǵaıyndy qazymen qamtamasyz etkeli eki jyl bolǵan.
Saǵynǵalı Mamaı qazy jasap kórýge bel býǵan kezde jylqy eti ol jerde tapshy bolǵandyqtan, sol etti, ishekterdi, barlyq ıngredıentterin tabýǵa jarty jyl ýaqyty ketken. Aldymen ózine jasap, onan soń dostary, dostarynyń dostary, ári qaraı, adamdar bir-birinen estip, qazyǵa tapsyrys kóbeıgen.
Arna tilshisiniń aıtýynsha, qazir jylqynyń etin jemeıtin belgııalyqtar tarapynan qazaqtyń qazysyna suranys artyp, birden 30 qazy jasaýǵa da tapsyrys beriledi eken.
Ǵalamtordan qazy aınaldyrýdy úırengen kásipkerdiń sózinshe, bir qazyny aınaldyrýǵa 5-10 mınýt ýaqyt ketedi, jińishke ishekke etti tez tyǵyndaý úshin plastıkten arnaıy qural jasap alǵan. Tutynýshynyń talǵamyna sáıkes, ózbekterge ánis ósimdigin qosyp, eýropalyqtarǵa qazynyń maıyn azdaý qylyp aınaldyrady eken. Qazy jasaýdyń has sheberine, ásirese Eýropadaǵy óz qandastarymyz rıza.
«Qonaq shaqyryp, et asatyn bolsaq, áýelgi habarlasatyn kisimiz osy Saǵynǵalı. Birden ákelip beredi. Qazyny óte dámdi qylyp daıyndaıdy. Dámi Qazaqstanda jasalynatyn qazy sııaqty», deıdi Belgııadaǵy qazaq dıasporasynyń ókili Aınur Ońtalapqyzy.
Jekelegen adamdardyń ulttyq dámge degen saǵynyshyn basyp júrgen kásipker qazir Eýropa qazaqtarynyń toı-domalaqtaryna iri kólemde tapsyrys alady eken. Qazynyń baǵasy salmaǵyna qaraı 15-25 eýro aralyǵynda. Qazaqtardy shattyqqa bólep, sheteldikterge ulttyq taǵamdy dáriptep júrgen Saǵynǵalı Mamaıdyń endigi kózdegen jospary - Belgııada seh ashyp, qazylaryn jergilikti saýda oryndarynda satylymǵa shyǵarý.
