Iá, repertýaryndaǵy úzdik qoıylymdar iriktelip alynǵan «Astana Operanyń» jaýhar týyndylary, shyn máninde, Krıjanke sahnasynyń kórkin kirgizdi. Gastrol shymyldyǵy klassıkamen túrildi. Adolf Adannyń «Korsar» baletinen úzindini ataqty ártister – Parıjdegi uzaq merzimdik óner kórsetýden jýyrda ǵana oralǵan Ánel Rústemova, sondaı-aq Oljas Tarlanov pen trýppa solısi Dıas Qurmanǵazy oryndady. Jetekshi solısi Erkin Rahmatýllaev pen solıst Shuǵyla Ádephannyń ınterpretasııasyndaǵy Rıkkardo Drıgonyń «Boıtumar» baletinen pa-de-de kórermenderdiń zor súıispenshiligine ıe boldy. Ashyq aspan astyndaǵy teatr sahnasyna qazaqstandyq prıma Áıgerim Beketaeva bıdegi juby Oljas Tarlanovpen birge shyqqanda qoshemettiń qatty estilgeni sonsha, búkil Lıýblıana qol soqqandaı boldy. Oryndaýshylar Maks Rıhterdiń mýzykasyna Raımondo Rebektiń «Qazirgi sát qansha ýaqytqa sozylady?» spektaklinen dýet usyndy.
Al Rolan Petıdiń «Leda men Aqqý» nómirin oryndaǵan solıster Anastasııa Zaklınskaıa men Jánibek Ahmedıevtiń jalyndy jubyna tańdaı qaqpaǵan kórermen kem de kem. Osynaý biregeı nómir Eýropada sırek kórsetiledi, sondyqtan kópshilik ártisterdiń óner kórsetýin aıryqsha súıispenshilikpen qarsy aldy. Sonymen qatar teatrdyń jetekshi solısteri – Shuǵyla Ádephan, Serik Naqyspekov, Arman Orazov, balet ártisi Sofııa Ádilhanova da joǵary kásibılikti pash etti.
Keshtiń basty oqıǵasy Renat Gaısınniń mýzykasy mán bergen «Dala úni» men «Turan» etno-folklorlyq ansambliniń mýzykasyna qoıylǵan horeograf Patrık de Bananyń «Qıly zaman» ulttyq nómiriniń oryndalýy boldy desek, tıtteı de artyq aıtqanymyz emes. Oryndaýshylar Anastasııa Zaklınskaıa, Ǵalymjan Nurmuhamet, Bekzat Orynbaev pen Sultanbek Ǵumar jetkizgen ulttyq kolorıtti, qazaq halqynyń rýhyn slovenııalyqtar laıyqty baǵalap, solısterge dý qol shapalaq pen «Bravo!» degen lebizderin jaýdyrdy.
– Men Lıýblıanada týyp-óstim ári ózimdi naǵyz asqaq óner jankúıerimin dep aıta alamyn, sondyqtan ár jyldarda ótken Lıýblıana festıvali jadymda jaqsy saqtaldy. «Astana Opera» ártisteriniń óner kórsetýi – men tamashalaǵan úzdik ári kásibı óner kórsetýlerdiń biri boldy. Klassıkany, ulttyq nómirler men zamanaýı baletti bir gastroldik baǵdarlamaǵa úılesimdi syıǵyzý – asqan sheberlik. Osy oraıda balet trýppasynyń kórkemdik jetekshisi Altynaı Asylmuratovaǵa rahmetimdi aıtyp, qazaq baletiniń óskenine nazar aýdarǵym keledi. Trýppa erekshe, onyń óz máneri bar: erler quramy da, áıelder quramy da naǵyz kásibı deńgeıdi kórsetti. Talantty trýppanyń ónerin taǵy bir tamashalasam, óte qýanyshty bolar edim, – dep áserimen bólisti Agata Reznık esimdi kórermen.
Al gastroldiń ekinshi kúni usynylǵan cheh horeografy Irjı Kılıannyń Mosart mýzykasyna qoıylǵan «Alty bı» baleti de slovenııalyq bekzat óner jankúıerleriniń sezim pernesine dóp tústi. Teatr repertýaryn byltyr tolyqtyrǵan aıtýly baletti kórermen Krıjanke sahnasynan da zor qoshemetpen qarsy aldy. Bul kúni spektaklde Karınniń rólinde Adelına Tólepova óner kórsetse, Poldyń partııasyn Oljas Tarlanov usyndy. Karolınany Baqytgúl Ispanova, Iohandy Danııar Jumataev, Lızany Móldir Shákimova, Patrıkti Sultanbek Ǵumar, Nensıdi Mádına Qojamjarova, Ýrsıdi Aıbar Toqtar sátti somdady.
– Spektakldi basynan aıaǵyna deıin zor qyzyǵýshylyqpen tamashaladym. Bul ýaqyt jaǵynan qysqa bolsa da, mazmuny jaǵynan bir keremet, qyzyqty dúnıe eken. Ol maǵan kúndelikti kúıbeń tirlikti umyttyrdy. Horeografııasy kúrdeli eken, sondaı-aq ol asqan akterlik sheberlikti talap etti. Bul qabilet sahnada óner kórsetken 8 bıshiniń árqaısysynda tolyqtaı boldy. Olar kúldiretin jerde kúldirdi, sonymen qatar ǵalamnyń mańyzdy máseleleri týraly oılanýǵa jeteledi. Osy úshin «Astana Opera» ártisterine alǵysym sheksiz, olar bizge zor áser syılady. Bul ártister álemniń qaı buryshynda óner kórsetse de, árdaıym kórermenderdiń súıispenshiligine ıe bolatynyna senimdimin, – dep qoıylymnan erkshe ásermen shyqqan Leo Lebar esimdi taǵy bir talǵampaz kórermen elordalyq teatr ujymyna ystyq lebizin jetkizdi.
Qazaqstandyq ártisterdiń ónerin tamashalaýǵa jer-jerden arnaıy kelgen kásibı mamandar, balet tanýshylar men balet synshylary da «Astana Opera» teatrynyń ónerine oń baǵasyn berdi. Sonyń biri – Sankt-Peterbýrgtegi Marııa teatrynyń burynǵy solısi Anastasııa Matvıenko. Ol óziniń áleýmettik jelidegi paraqshasynda: «О́te myqty trýppa. Trýppada tek qazaqstandyq balet ártisteriniń jumys isteıtini jáne onda shaqyrylǵan nemese sheteldik ártisterdiń bolmaýy tańdanys týǵyzady. Balet trýppasynyń kórkemdik jetekshisi Altynaı Asylmuratova osyndaı qıyn joldy tańdaǵan eken. Bárekeldi!», dep jazdy.
Slovenııadaǵy óner kórsetý balet trýppasynyń onynshy mereıtoılyq maýsymdaǵy qorytyndy týry boldy. Teatrdyń tabysty týyndylary áste munymen támamdalmaq emes. Aldaǵy on birinshi maýsymda da ártisterdi shet elderge gastroldik saparlar, tól teatr sahnasynda repertýarlyq qoıylymdar men premeralar kútedi. Jańa maýsymnyń jańalyǵy budan da jarqyn bolmaq!
