Tankıster salmaǵy áldeneshe tonnany quraıtyn shynjyrly mashınamen sý kedergilerinen kidirmeı ótý algorıtmin úırenip jatyr. Sý ishinde qozǵalý úshin tankter jaýyngerlik mashınaǵa aýa beretin arnaıy jabdyqtarmen qamtylǵan.
Tankpen sýǵa túser aldynda lıýkter arnaıy sý ótkizbeıtin jabdyqtarmen tyǵyzdalyp jabylady. Oqpannyń aýzyna da óziniń qaqpaǵy kıgiziledi. Sańylaýlar men tesikter arnaıy sý ótkizbeıtin maılaǵyshpen óńdeledi. Dızaın erekshelikterine baılanysty T-72 tanki sý astynda bes metr tereńdikte bir shaqyrym qashyqtyqty júrip ótýge qabiletti.
– Ekıpajdar jeńil súńgýirlik daıyndyq kýrsynan ótti. Olar osylaısha tótenshe jaǵdaıda durys jáne senimdi áreket etýge daǵdylandy. Tank sýǵa batqan jaǵdaıda ekıpaj eki saǵatqa deıin aýa qory bar IP-5 oqshaýlaǵysh tynys alý qurylǵylaryn jáne qutqarý keýdeshelerin paıdalanady. Bizdiń tankıster jaz boıy mashınany sý ishinde júrgizýdiń tájirıbelik daǵdylaryn jetildirdi, – deıdi 12740 áskerı bóliminiń komandıri, podpolkovnık Dáýlet Sekenov.
Júrgizýshi mehanık úshin kólikti sý ishinde aıdaý ońaı jumys emes. Tank azımýt kórsetkishiniń nusqaýy boıynsha jaı manevrmen júrýi kerek. Bul jaǵdaıda júrgizýshi mehanık sý astynda toqtap qalmas úshin qozǵaltqyshtyń aınalý jyldamdyǵynyń turaqtylyǵyn baqylaýy mańyzdy.
Qutqarý-kóshirý quraldarynyń ekıpajdary jeke quramnyń qaýipsizdigin qamtamasyz etip, sýdaǵy tankti jiti baqylap otyrady. Tosyn jaǵdaıda olar áskerı qyzmetshiler men jaýyngerlik mashınany qurlyqqa evakýasııalaıdy.
