Álıhan Smaıylovtyń óńirlik aýyl sharýashylyǵy qurylymdarynyń basshylarymen kezdesýi barysynda sýbsıdııalaý, aýyl sharýashylyǵy tehnıkasy men mıneraldy tyńaıtqyshtar satyp alý, egistik sýmen qamtamasyz etý jáne basqa da birqatar máseleler kóterildi. Atap aıtqanda qurǵaqshylyq saldarynan bolǵan egin shyǵynyn óteý týraly másele kóterildi. 
Premer-mınıstr qazirgi ýaqytta óńirlik aýqymdaǵy tótenshe jaǵdaı jarııalaý jáne Úkimet rezervinen qarajat bólý esebinen fermerlerdiń shyǵyndaryn óteý máselesi pysyqtalyp jatqanyn atap ótti.
«Jospar boıynsha qyrkúıek aıynyń sońyna deıin barlyǵy eseptelip, tıisti qarajat bólinetin bolady. Sondaı-aq respýblıkalyq bıýdjetten sýbsıdııalarǵa qarjy bólý jáne olardy keshiktirmeı tóleý máselesin jyldamdatyp jatyrmyz. Bul jumys Memleket basshysynyń baqylaýynda», dedi Álıhan Smaıylov.
Taǵy bir másele «Jasórken» gıdrobeketin qalpyna keltirýge qatysty boldy, ol sýdy ádiletti bólip, esepke alýǵa múmkindik beredi. Premer-mınıstr ol úshin Úkimet rezervinen 450 mln teńge qarajat bólý týraly tıisti mınıstrlikke jáne ákimdikke tapsyrma berilgenin habarlady.
«Bul jumysty bıyl bastaý kerek», dedi ol.
Taǵy bir suraqqa jaýap bere otyryp, Álıhan Smaıylov qazirgi ýaqytta uńǵymalardy qazýǵa ketken shyǵyndardy óteý úlesin 50%-dan 80%-ǵa deıin ulǵaıtý múmkindigin qarastyryp jatqanyn atap ótti.
О́ńirde sýarmaly jer kólemi 181,8 myń gektardy quraıdy, 2025 jylǵa qaraı ınfraqurylym nysandaryn jóndeý jáne 14 jańa sý qoımasyn salý esebinen taǵy 54,9 myń gektardy aınalymǵa engizý josparlanyp otyr.
Sýdy tıimdi paıdalaný maqsatynda qazirdiń ózinde 54,3 myń gektar jerge sý únemdeý tehnologııalary engizildi, jyl sońyna deıin bul kórsetkishti 57 myń gektarǵa jetkizý josparlanǵan. Oblys ákimi Nurjan Nurjigitov jerasty sýlaryn tıimdi paıdalaný, uńǵymalardy burǵylaý jáne basqa da sý únemdeý sharalaryn júzege asyrý basty nazarda ekenin aıtty.
Dıqandardy ylǵal únemdeıtin tehnologııalardy qoldanýǵa yntalandyrý úshin ınvestısııalyq sýbsıdııalar túrinde memlekettik qoldaý kórsetiledi. Ol zamanaýı sýarý júıelerin satyp alýǵa jumsalǵan shyǵyndardyń 50%-yn óteýdi, sondaı-aq barlyq qajetti ınfraqurylymdy júrgizýdi kózdeıdi. Birneshe jyl ishinde 385 sharýa qojalyǵy 5 mlrd teńgege kóleminde qoldaý kórsetildi.
Sonymen qatar jalpy kólemi 53,9 myń ga aýmaqta mańyzy bar sýarý kanaldaryn, drenajdyq júıelerdi jáne basqa da qurylystardy qaıta jańǵyrtý jáne salý boıynsha jobalardy pysyqtaý jumystary júrgizilip jatyr. Atap aıtqanda, uzyndyǵy 21,8 shaqyrym bolatyn Seńkibaı kanaly 4 myń ga sýarmaly jerdi sýmen qamtamasyz etedi.
Sondaı-aq QR Premer-mınıstrine «Aýyl amanaty» jobasynyń iske asyrylý barysy týraly aqparat berildi. Memleket basshysynyń qoldaýymen ázirlengen joba 2019 jyly Jambyl oblysynda iske qosylyp, óziniń ekonomıkalyq jáne áleýmettik tıimdiligin dáleldedi. Jalpy, 2019-2023 jyldar aralyǵynda oblys boıynsha ony júzege asyrýǵa 42,3 mlrd teńge bólindi. Sonyń nátıjesinde 50 aýyldyq okrýgten 11 myńǵa jýyq adam óz kásibin ashty.
