Foto: pavlodarnews.kz
Pavlodarnews.kz usynǵan málimetine súıensek, Rodıon Ivanovtyń taıaýda TikTok jelisinde shyqqan vıdeosy 2 mıllıonnan asa qaralym jınaǵan. Jeli qoldanýshylary ulty orys jigitiniń qazaqsha taza sóılegenine rıza bolyp, jyly lebizderin jarysa jazyp jatty.
Al Rodıonnyń aıtýynsha, jelide taraǵan vıdeony osydan eki jyl buryn ápkesi túsirip alǵan.
«Bul – muraǵattyq vıdeo, onyń búkil jerde tarap ketetinin kútpedim», – deıdi ol.
Rodıon orys tildi balabaqsha men mektepke barǵan, al qazaq tiline oqýshy kezinde qyzyǵa bastaǵan.
«Ekinshi synypta qazaq tilin oqyp júrgenimde «Qazaqstan» telearnasynda kórsetilgen káris serıaldaryn qarap, sol arqyly úırenip aldym. Serıaldy oryssha sýbtıtr arqyly qaraǵan edim», deıdi Rodıon.
Otbasynda bes adamnyń ishinen tek Rodıon ǵana qazaq tilin erkin meńgergen eken.
«Men qazaqsha oılaı bastadym. Keıde oılaǵan nárseni aıtpaı qoıamyn, sebebi tyńdaýshy adam meni túsinbeı qalýy múmkin ekenin bilemin. Sondyqtan oıymdy orysshaǵa aýdarýǵa týra keledi», deıdi Rodıon.
Onyń oıynsha, qazaq tilin úırený úshin eń bastysy «q», «ǵ» syndy tól dybystardy jattap alý kerek.
