Is-sharaǵa Qorǵanys mınıstrliginiń ókilderi, Qarýly kúshterdiń ardagerleri, «Atamnyn Amanaty» QB, «Áskerı-patrıottyq jáne izdestirý qozǵalysy qaýymdastyǵy» RQB ókilderi, Qarýly kúshter Ulttyq áskerı-patrıottyq ortalyǵynyń áskerı qyzmetshileri qatysty.
– Búgin maıdanda qaza tapqan qazaqstandyq jaýyngerler týǵan topyraǵyna oraldy. Habarsyz ketkenderdiń taǵdyry olardyń urpaqtaryn áli kúnge deıin alańdatady. Olar atalary men ákelerinen qandaı da bolsa habar kútedi. Urpaǵy úshin óz ómirlerin qurban etken barlyq jaýynger máńgi esimizde, – dep atap ótti Qorǵanys mınıstrligi Tárbıe jáne ıdeologııalyq jumys departamentiniń bastyǵy, ádilet polkovnıgi Tileýhan Basqojaev.
Izdestirýshilerdiń erik-jigeriniń arqasynda eki qazaqstandyq qyzylásker – 1913 jyly týǵan Ivan Sýrnın men 1903 jyly týǵan Fılıpp Parasenkonyń taǵdyry belgili boldy. 117-jeke atqyshtar brıgadasynyń jaýyngeri Ivan Fılıppovıch Sýrnındi «Pokolenıe» izdestirý jasaǵynyń izdeýshileri Tver oblysynyń Olenın mýnısıpaldy okrýgine qarasty Dronıcheno eldi mekeninen tapqan. Ol soǵysqa Soltústik Qazaqstan oblysynyń Presnov aýdandyq áskerı komıssarıatynan shaqyrylǵan.
Almaty oblysynyń týmasy Fılıpp Lavrentevıch Parasenkonyń súıegin aımaqtyq «Frontovye dorogı» áskerı-patrıottyq izdeý klýbynyń izdeýshileri izdep tapqan. Ol Almaty oblysynyń Alakól aýdanynan shaqyrylǵan.
Soltústik Qazaqstan oblysynda Ivan Sýrnınniń nemeresi Galına Samsonova turady.
– Atamyzdyń Otanyna oralǵany úshin Qorǵanys mınıstrligi men reseılik izdeýshilerge shyn júrekten alǵys aıtamyn. Atamyz qyzynyń janyna jerlenedi. Anam ákesiniń aýyr shaıqasta qaza tapqanyn biletin. Ol bul týraly soǵystan aman oralǵan atamnyń qarýlas dosynan estip bilgen, – deıdi Galına Tarasovna.
О́kinishke qaraı, Fılıpp Lavrentevıch Parasenkonyń týystary áli tabyla qoıǵan joq. Marqumdy qaıta jerleýmen Jetisý oblysyna qarasty Alakól aýdanynyń ákimdigi aınalyspaq. Qaıta jerleý rásimderi óńirlerde áskerı qurmetpen ótedi.
