Tabıǵatpen úndesken qoltańba

Belgili qazaqstandyq grafık-dızaıner Sáýle Beksultanova dızaın men ónerdi tamasha úılestiredi. Onyń portfolıosynyń úlken bóligin tabıǵattyń jarqyn kórinisteri, ásirese janýarlar áleminiń sulýlyǵy qu­raıdy. Onyń lınogravıýra men sıfrlyq ónerdiń úılesimi bolyp sanalatyn ınno­va­sııalyq jumysy aıtýǵa turarlyqtaı.

Sáýleniń grafıkalyq jumystar serııasy sımmetrııaly dóńgelek kompozısııaly frak­taldar túrinde berilgen. Fraktaldar bir-biriniń ústine qoıylǵan tabıǵattyń ártúrli lınogravıýra elementterinen turady. Olar – ja­nýarlar men ósimdikter áleminiń ókilderi. Bul serııa kóptegen halyqaralyq zamanaýı óner kórmesinde jurtshylyq nazaryna usynylǵan. Máselen, «Forest Fractal 7» jumysy bıylǵy maýsym aıynda London men Afınada ótken The Holy Art «Art On Loop London-Athens» kórmesinen oryn aldy. Al «Meadow Flora Fractal 2» jumysy ósimdikter álemine arnalǵan áıgili kanadalyq Exhibizone «Gardenia 2023» kórmesine qoıyldy.

Sáýle Beksultanovanyń fraktaldy shyǵarmalarǵa baı óneri tabıǵat sheji­re­sin asha túsedi. Ár jumysy Jer bıo­sfe­ra­syndaǵy ózara baılanysty beıneleı oty­ryp, onyń ekojúıeleriniń názik tepe-teńdigine basa nazar aýdarady. Qalyń ormannan qulazyǵan shólge deıingi árbir tabıǵı meken sýrettelip, ómirdiń keń gobeleninde taptyrmas qundylyǵymen tanylady. Ol óz jumysynda tabıǵattaǵy sımbıotıkalyq qarym-qatynasqa erekshe mán berip, flora men faýnanyń ózara tereń táýeldiligin eske salady.

Jahandyq ekologııalyq máseleler – klı­mat­­tyq aýytqýlardan bastap, ormandar­dyń jappaı otalýyna deıin kez kelgen sýret­shi­niń tabıǵat-anany saqtaý jolyndaǵy perzenttik paryzy. Bul taqyryp – Sáýle Bek­sul­tanovanyń jumysynyń aınymas ózegi. Onyń sý serııasy sý resýrstary men sýly jerlerdi saqtaýdyń qajettiligin sanaǵa sińiredi. Sondyqtan «Ocean Fractal» jáne «See Fractal» jumystary osy jyldyń maýsym aıynda AQSh-taǵy Colors of Humanity Art Gallery jyl saıynǵy sý kórmesinde kelýshiler nazaryn aýdardy. Osy ataý­ly kórmege Kanada, Qytaı, Germanııa, Úndistan, Irlandııa, Japonııa, Qazaqstan, Nı­derland, Polsha jáne Ońtústik Koreıa sııaqty 11 eldiń sýretshileriniń ju­mys­tary qoıyldy. Bul jyl saıynǵy is-sharanyń uıymdastyrýshylary Saharanyń ońtústigindegi Afrıkadaǵy taza sý men tıisti sanıtarııaǵa qoljetimdiliktiń joq­tyǵynan orynsyz zardap shegetin qaýym­darǵa turaqty sý sheshimderin usynatyn kommersııalyq emes The Water Project uıy­myna qaıyrymdylyq jasaıdy.

Osyndaı jobalarǵa qatysý Sáýle Beksul­ta­novanyń shyǵarmashylyǵyn elimizdegi qorshaǵan ortany qorǵaýǵa serpin berý baǵy­tyn­da jalǵastyrýǵa shabyttandyra túsedi. Osyndaı ekologııalyq jobalarǵa qarajat jınaýdy kózdeıtin óner jobalary kóbeıe tússe, nur ústine nur.