Anyqtaǵanymyzdaı, bul egistik alqabynyń ıesi «Nurgeldi» aýyl sharýashylyǵy óndiristik kooperatıviniń ıesi Muhtar Toıqyldy esimdi qandasymyz bolyp shyqty. Qytaıdyń Altaı aımaǵynan 2005 jyly atajurtqa oralǵan ol alǵashynda 1-2 gektar jer telimin alyp, kartop egip, sodan túsken ónimdi saýdalap, buıyrǵan rızyǵyn kórip júrgen eken.
Sóıtip, ótken jyly memlekettiń kásipkerlikti qoldaý kartasy aıasynda 1,5 myń gektar alqapty ıgerýge qol jetkizip, oǵan jońyshqa, kúnbaǵys, qarbyz egýge bel sheshe kirisedi. Egistik alqabyna sý kózi Shar sý qoımasy arqyly keledi. Ony Muhtardyń muryndyq bolýymen jumysshy azamattar túrli tásilmen júıekterge jiberedi.
Qolda bardy uqsatyp, buıyrǵan jerdi jaıqaltqan dıqannyń aıtýynsha, kútip-baptaýdyń jónin bilgen adamǵa jer-ananyń berer nesibesi mol.
– Kúnbaǵys alqabynan 20-25 sentner ónim alarmyz dep otyrmyn. Qarbyzdan 30 tonna shamasynda shyǵyp qalatyn syńaıly. Eksheı qaraǵanda 400-500 mln teńgeniń ónimin alý jolynda tynbaı eńbektenip jatyrmyz. Árıne, jumys ońaı emes. Biraq jumysshylarymnyń da jaǵdaıyn jasaýǵa tyrysyp jatyrmyn. Jalaqylary – 300 myń teńge kóleminde. Keleshekte birtindep baspanamen de qamtyp, yntalandyryp otyrý nıetim bar. Qazirgi ýaqytta turaqty 15-20 adam jumys istep júr. Odan ózge aýdan ómirinde bolyp jatatyn eldik maqsattaǵy isterge úles qosyp, áleýmettik az qamtylǵan otbasylarǵa da qolushyn berip júremin, – deıdi dıqan.
Muhtar Toıqyldynyń «Nurkeldi» aýyl sharýashylyǵy óndiristik kooperatıvi jońyshqa ósirý jobasyn da josparlap otyr. Quny 6,2 mlrd teńgeni quraıtyn joba aıasynda 2024 jylǵa deıin jońyshqa óndirý zaýytyn salýdy júzege asyrmaq. Jalpy, jerdi ıgerý maqsatynda 7 mlrd kóleminde ınvestısııa tartyp, úlken iske táýekel etken azamattyń betburysy óte aýqymdy. 500 gektar aýmaqqa jońyshqa salǵan ol «Qalbataýdyń jeri tastaq, qarbyz shyqpaıdy» degenderdiń de sózin teriske shyǵaryp, tańǵaldyryp otyr.
Abaı oblysy
