Sońǵy 5 jylda azamattyq qorǵaý organdarynda 150-ge jýyq sybaılas jemqorlyq faktisi tirkelgen. Sybaılas jemqorlyq qylmystary elimizdiń barlyq óńirinde oryn alǵan. Olardyń basym bóligi Almaty, Astana, Shymkent qalalaryna, sondaı-aq Qostanaı jáne Almaty oblystaryna tıesili. Anyqtalǵan qylmystardyń ishinde paraqorlyq pen jymqyrý faktileri basym. «Zańsyz syıaqy» órt qaýipsizdigin qamtamasyz etý boıynsha tekserý aktisine qol qoıý kezinde, oqýdan ótkizý, ruqsat berý jáne jumysqa ornalasý úshin berilip otyrǵan.
Agenttik tóraǵasy atap ótkendeı, júrgizilip jatqan sybaılas jemqorlyqqa qarsy jumystarǵa qaramastan, TJM qyzmetkerleri para alýdan tyıylar emes. «Kúni keshe Jetisý oblysynda jergilikti TJ bólimi basshysy jumysqa alǵan adamnan aqsha alǵany anyqtaldy. Búgingi is-sharanyń ótetinin bile tura, sonda da qylmysqa baryp otyr. Bul oraıda profılaktıkalyq turǵyda naqty áreket etý qajet. Qyzmetkerlerdiń minez-qulqyn túzetip, psıhologııalyq kózqarasyn ózgertý mańyzdy», dedi ol.
Buǵan deıin Sybaılas jemqorlyqqa qarsy qyzmet TJM О́rtke qarsy qyzmet komıtetiniń tóraǵasyn, Shymkent qalasynyń jáne Jetisý oblysynyń TJ departamentteri basshylaryn ustaǵan bolatyn. Olar órtke qarsy qaýipsizdik salasyndaǵy «qamqorlyǵy» úshin kásipkerlerden júıeli túrde para alyp otyrǵan, tekseriletin uıymdardy kelisimshart jasasý jolymen qyzmetterdi satyp alýǵa májbúrlep, olar boıynsha ýaqytyly aqy tóleýin qamtamasyz etti degen kúdikke ilingen. «Balyq basynan shirıdi» demekshi, basshylardyń ózi jemqorlyq qylmysyna barǵan oqıǵalar Almaty qalasynda, Shyǵys Qazaqstan, Qyzylorda jáne Soltústik Qazaqstan oblystarynda da oryn alǵanyn aıta ketý kerek.
Tótenshe jaǵdaılar mınıstri S.Sháriphanov bul faktilerdi moıyndap, vedomstvo sybaılas jemqorlyqqa qarsy kúresti kúsheıtý úshin túbegeıli qadamdar jasaıtynyn málimdedi. «Bul bizdiń qyzmetkerler úshin jaǵa ustatarlyq jaǵdaı. Atalǵan adamdar belgili bir jetistikterge qol jetkizgen úzdik qyzmetkerlerdiń qatarynan bolatyn. Degenmen osy jaǵdaıda olardyń biz bilmegen teris qasıeti – ekijúzdiligi áshkerelenip otyr. Budan biz tıisti sabaq alamyz, qarapaıym órt sóndirýshiler bizge senimmen qaraýy kerek», dedi ol.
Sybaılas jemqorlyqqa qarsy qyzmet tarapynan Tótenshe jaǵdaılar mınıstrligine jeke quram arasynda júrgiziletin aldyn alý jumystaryn kúsheıtý usynyldy. «Sybaılas jemqorlyq táýekelderine ishki taldaý júrgizip, problemalyq ýchaskelerdi zerdeleý, sondaı-aq vedomstvonyń barlyq qyzmetkerlerin adaldyq turǵysynda tekserýdi aprobasııalaý qajet», dedi A.Jumaǵalı.
