Dúnıejúzilik básekede joǵary atalǵan lısenzııalardy 31 memleket ózara bólisti. Bul qatarda Qazaqstan quramasy da bar. Elimizge jalǵyz joldamany pnevmatıkalyq vıntovkamen 10 metrden nysana kózdeýdiń fınalyna shyǵyp, 4-oryn alǵan Islam Satpaev alyp berdi. Aıta keteıik, bul nysana kózdeýden bizdiń mergender qol jetkizgen alǵashqy Olımpıada lısenzııasy. Osyǵan deıingi Tokıodaǵy oıyndarda el namysyn Iýrıı Iýrkov jalǵyz ózi qorǵaǵan. Sporttyń bul túrinde álem chempıonatynyń joldamasy jekelegen atletke emes, Ulttyq federasııaǵa beriledi. Alaıda ár memlekettiń federasııasy kútpegen jaǵdaı bolmasa, olımpııa oıyndaryna joldamaǵa qol jetkizgen sportshyny aparady. Fransııadaǵy oıyndarda barlyǵy 340 mergen júldege talasady dep josparlanǵan.
Baký tórinde eń kóp joldamany Qytaı jeńip aldy. Olar 12 baǵdarlamanyń jeteýinde qazirden bastap kimdi aparatynyn oılastyra berse bolady. Sary qurlyqtan sońǵy bolyp keshe trap baǵdarlamasynda Kýveıt sportshysy júldeger atanyp, quramasyna joldama syılady.
Búgingi málimet boıynsha nysana kózdeýden (tapansha, vıntovkamen oq atý jáne stend atý) 45 elde joldama bar. Jarys qojaıyny retinde Fransııa birden 12 lısenzııaǵa ıe bolǵan.
«Kele jatqan Parıjdegi oıyndarda Tokıomen salystyrǵanda nysana kózdeýden az sportshy qatysady (Japonııada 360 lısenzııa bolǵan). Sizderdiń sportshylaryńyz áli qurlyq chempıonaty men Álem Kýbogynyń fınaldy kezeńinde jaqsy nátıje kórsetip, lısenzııa jeńip ala alady. Jalpy Azııada nysana kózdeý qarqyndy damyǵan. Buǵan Bakýdegi jarys kezinde taǵy kýá boldyq», dedi ISSF-tiń Bas hatshysy Vıllı Grıl myrza.
Qazir Marııa Dmıtrıenko, Aıjan Dosmaǵambetova, Nargıza Sarmanova, Danııl Pochıvalov, Álisher Aısalbaev pen Vıktor Hasıanov stend atýdyń trap baǵdarlamasynda aralas komandalyq synda óner kórsetip jatyr. Erteńnen bastap jyljymaly nysana kózdeýden qazaqstandyqtardan Baqtııar Ibraev, Andreı Hýdıakov, Asadbek Nazırkýlev, Ilıa Zoteev, Fatıma Irnazarova, Zýhra Irnazarova, Aleksandra Sadýakasova júldege talasty bastaıdy. Ázerbaıjan astanasyndaǵy doda 1 qyrkúıekte máresine jetedi. Bıylǵy dodaǵa 101 memleketten 1250 mergen keldi.
