Lızıng naryǵyndaǵy kóshbasshy
Memleket basshysy ótken jylǵy «Ádiletti memleket. Birtutas ult. Berekeli qoǵam» Joldaýynda: «Aýyl sharýashylyǵyn damytý – negizgi problemanyń biri. Osy saladaǵy ahýal memleketimizdiń azyq-túlik qaýipsizdigine tikeleı áser etedi», dep atap aıtty. Oǵan qosa jańa jetijyldyq merzimge saılanǵan Prezıdent birinshi Jarlyǵyn aýyldy damytý máselesine arnap, Úkimetke aýyldy damytýdyń bes jylǵa eseptelgen naqty josparyn ázirleýdi tapsyrdy. Osy oraıda «QazAgroQarjy» AQ Memleket basshysynyń saıasatyn belsendi júrgizýge atsalysa otyryp, tehnıka satyp alýǵa lızıng berý arqyly elimizdiń agroónerkásip kesheniniń damýyna eleýli úles qosyp keledi.
1999 jyly negizi qalanǵan kompanııa kúni búginge deıin sapaly ári básekege qabiletti lızıng qyzmetterin usyna otyryp, aýyl sharýashylyǵy taýar óndirýshilerin qajetti tehnıkamen qamtamasyz etip keledi. Shyn máninde, «QazAgroQarjy» AQ – Qazaqstannyń agroónerkásip kesheni salasyndaǵy lızıng naryǵynyń kóshbasshysy. «Báıterek» holdıngine qarasty kompanııa bul salany túgeldeı zamanaýı jáne joǵary tehnologııalyq tehnıkamen qamtamasyz etip otyr. Onyń elimizdiń barlyq óńirinde ókildigi bar, búginde respýblıka boıynsha 15 bólimshesi jumys istep tur. Osylaısha, respýblıkamyzdyń qaı túkpirinde bolsyn aýyl sharýashylyǵyn órkendetýdi maqsat etip otyr.
Kásipkerge maqsatyna qaraı tańdaý kóp
«QazAgroQarjy» AQ usynǵan baǵdarlamadaǵy birneshe tańdaý aýyl sharýashylyǵynyń qajettigine qaraı kez kelgen tehnıkany satyp alýǵa múmkindik beredi.
Kompanııa bıylǵy 26 maýsymda 4 baǵdarlamany iske qosty. Sonyń ishinde «О́z jemshóbimiz» baǵdarlamasy mal sharýashylyǵyn jemshóppen qamtamasyz etýge, sol arqyly mal ónimdiligi men ónimin arttyrýǵa baǵyttalǵan. Baǵdarlamany júzege asyrýǵa 20 mlrd teńge bólinip otyr.
Sondaı-aq otandyq taýar óndirýshilerdi qoldaýǵa baǵyttalǵan «Qazaqstanda jasalǵan» baǵdarlamasy bar. Bul elimizde jasalǵan nemese jınaqtalǵan aýyl sharýashylyǵy tehnıkasyna lızıng berýdi qarjylandyrýdy kózdeıdi. Oǵan 15 mlrd teńge qarjy bólingen. Al áleýmettik mańyzy bar azyq-túlik (kókónis, jemis-jıdek, qant qyzylshasy) óndirýshilerdi qoldaýǵa baǵyttalǵan «Jasyl ónim» baǵdarlamasyna 10 mlrd teńge bólindi.
Lızıng arqyly 5 tehnıka alǵan sharýa
2022 jyly «QazAgroQarjy» AQ-nyń jeńildikti baǵdarlamasyna qatysqandardyń biri – «Maıqynov» sharýa qojalyǵy. 2010 jyldan beri Jetisý oblysy Alakól aýdanynda aýyl sharýashylyǵymen aınalysatyn osy ShQ byltyr Jetisý oblysyndaǵy «QazAgroQarjy» bólimshesi arqyly ótinish berip, avans tólemeı-aq 2 «Belarýs 892.2» traktoryn, 1 «Belarýs 1221.2» traktoryn lızıngke aldy.
Atalǵan ShQ, negizinen, egin sharýashylyǵymen, ıaǵnı bıdaı, arpa ósirýmen aınalysady. Ieliginde 859,1 ga jaıylymy, 925 ga egistigi, 192,3 ga basqa da jeri bar. Al bıyl Telegram arqyly taǵy 2 astyq jınaý kombaınyn alýǵa ótinish berip, «Qazaqstanda jasalǵan» baǵdarlamasy aıasynda «VECTOR 410KZ» kombaındaryn satyp alý úshin qarjylaı kómekke qol jetkizdi.
Jalpy, «QazAgroQarjy» 2000-2023 jyldar aralyǵynda Jetisý oblysyna 100 mlrd teńgeden asa qarajat ınvestısııalaǵan. Sóıtip, jergilikti sharýa qojalyqtarynyń 5 519 dana tehnıka satyp alýyna jaǵdaı jasaǵan. Satyp alynǵan tehnıkanyń jalpy quny – 43 339 mln teńgeni quraıdy. Al bıyl tehnıka satyp alýǵa 5 500 mln teńge qarastyrylyp otyr.
Aýyl sharýashylyǵy salasyndaǵy kásipkerler úshin joǵaryda atalǵan baǵdarlamanyń barlyǵy qoljetimdi. О́tinish bildirgen jáne tıisti talapqa saı kelgen uıymdar qarjylandyrý múmkindigine ıe bolady. О́tinishti kásip júrgizilip jatqan óńirdegi «QazAgroQarjy» bólimshesine nemese arnaıy Telegram bot arqyly da berýge bolady.
