Frto: Úkimettiń baspasóz qyzmeti
AMANAT partııasy fraksııasynyń keńeıtilgen jınalysynda sóılegen sózinde ol Ulttyq qordyń jınaqtaý fýnksııasyn kúsheıtý maqsatynda transfertterdi alyp qoıýdy jáne bıýdjet shyǵystarynyń ulǵaıýyn shekteý jónindegi jańa qaǵıdalar engizilgenin atap ótti.
«Bul, 2024 jylǵy 1 qańtardan bastap Memleket basshysynyń «Ulttyq qor – balalarǵa» bastamasynyń engizilýine baılanysty asa ózekti bolyp otyr. Bul joba jınaqtalǵan qarjyny 18 jasqa tolǵannan keıin bilim alýǵa, ne turǵyn úı satyp alýǵa paıdalana alatyn 6,7 mln balany qamtıdy», dedi Álıhan Smaıylov.
Onyń aıtýynsha, sońǵy 4 jylda bıýdjet shyǵystaryn ońtaılandyrý esebinen 4,7 trln teńge basqa basym mindetterge baǵyttaldy. Osy kezeńde salyqtyq jáne kedendik ákimshilendirýdi jaqsartý men sıfrlandyrý esebinen respýblıkalyq bıýdjetke qosymsha 2 trln teńgeden astam qarjy tústi.
Premer-mınıstr bıyl jeke tulǵalardyń bankrottyǵy týraly zań iske qosylǵanyn eske saldy.
«Búgingi tańda 10 myńnan astam azamat sottan tys bankrottyq rásimin paıdalandy. Bul olardyń qaryz júktemesin jáne qoǵamdaǵy áleýmettik shıelenisti azaıtýǵa múmkindik berdi», dedi ol.
Úkimet basshysy zańsyz satyp alynǵan aktıvterdi memleketke qaıtarý jónindegi jumysty kúsheıtý maqsatynda tıisti zań qabyldanǵanyn atap ótti. Sonymen qatar Demonopolızasııalaý jónindegi komıssııa jumysynyń nátıjesi boıynsha 16 kompanııanyń aksııalar paketi men qatysý úlesi, 7 ǵımarat 160 temir joldary men nysan, sondaı-aq aqshalaı qarajat memlekettik menshikke qaıtaryldy.
«Jalpy, kóleńkeli ekonomıkaǵa qarsy is-qımyl boıynsha qabyldanǵan sharalar sońǵy 4 jylda kóleńkeli ekonomıkanyń úlesin 27%-dan 19%-ǵa deıin tómendetýge múmkindik berdi», dedi Álıhan Smaıylov.
Premer-mınıstr jańa ınvestısııalyq sıkldy qalyptastyrý maqsatynda 2026 jylǵa deıingi Investısııalyq saıasat tujyrymdamasy iske asyrylyp jatqanyn aıtty.
Investısııalyq kelisimshart sheńberinde basym sektorlarda jumys isteıtin kompanııalar salyqtar men kedendik bajdardan bosatylady, zattaı granttardan alady.
Iri ınvestorlardy tartý úshin qoldanystaǵy memlekettik qoldaý sharalarynyń kez-kelgenin usyna otyryp, jeke sharttarmen Investısııalar týraly kelisim jasasý múmkindigi kózdelgen. Bul rette ınvestor úshin qarsy mindettemeler belgilenedi.
Sondaı-aq Investısııalyq mindettemeler týraly kelisim jasasý múmkindigi engizilip, onda salyq zańnamasynyń turaqtylyǵyna kepildik beredi.
Munaı-gaz salasyna qosymsha ınvestısııalar tartý maqsatynda 2023 jyldan bastap Jaqsartylǵan modeldik kelisimshart jasasý kezinde fıskaldyq yntalandyrý engizildi.
Birqatar sheteldik kásiporyndardy Qazaqstanǵa relokasııalaý boıynsha jumys sheńberinde búginde 35 iri sheteldik kompanııa elimizge kóship keldi. Osy baǵyttaǵy jumys odan ári pysyqtalyp jatyr.
«Qabyldanǵan sharalardyń arqasynda 2022 jyly tikeleı sheteldik ınvestııalardyń kólemi $28 mlrd-ty qurady. Bul − 10 jyl ishindegi rekordtyq kórsetkish. Jalpy byltyr negizgi kapıtalǵa salynǵan ınvestısııalar kólemi 15,1 trln teńgeni qurady», dedi Álıhan Smaıylov.
Premer-mınıstr pandemııa men kúrdeli geosaıası jaǵdaılarǵa qaramastan, qabyldanǵan sharalardyń arqasynda el ekonomıkasy senimdi ósim kórsetip otyrǵanyn atap ótti. Atap aıtqanda, bıylǵy 7 aıdyń qorytyndysy boıynsha IJО́-niń ósimi 4,8%-dy qurady. Barlyq negizgi salalarda oń dınamıka baıqalady.
Bıyl Jalpy ishki ónim jan basyna shaqqanda $13,3 myńǵa deıin ósti. Elimizdiń halyqaralyq rezervteri búginde $95 mlrd-ty quraıdy.
«Memleket basshysynyń aldyńǵy joldaýlarda bergen tapsyrmalary jalpy oryndaldy dep aıtýǵa bolady. Júıeli jáne uzaq merzimdi tapsyrmalardy iske asyrý jalǵasyp jatyr. Jalpy halyqtyń ál-aýqatyn arttyrýǵa baǵyttalǵan aýqymdy júıeli jumys atqarylyp keledi. Úkimet Parlamentpen birlesip, alǵa qoıylǵan mindetterdi iske asyrý jumysyn jalǵastyrady», dep qorytyndylady sózin Álıhan Smaıylov.
