Ortalyq Azııadaǵy ushqyshtar men ınjenerlik-tehnıkalyq quramdy daıyndaıtyn jalǵyz oqý ornynda Konstıtýsııa kúni qarsańynda áskerı ant qabyldaý rásimi ótti. Saltanatty jıynǵa oblys ákimi Eraly Toǵjanov qatysty.
«Sizder búgin Qazaqstan halqyna jáne onyń zańdy saılanǵan Prezıdentine adal qyzmet etýge ant qabyldap jatyrsyzdar. Bárińizdi shyn júrekten quttyqtaımyn! Oqý baǵdarlamasyn sátti ıgerip, elimizdiń Qarýly Kúshteriniń úlgili áskerı qyzmetkeri bolýlaryńyzǵa tilektespin! «Tártipsiz el bolmaıdy, tártipke baǵynǵan qul bolmaıdy» degen batyr Baýyrjan Momyshulynyń sózin basshylyqqa alyńyzdar. Otan úshin janqııarlyqpen qyzmet etińizder», dedi óńir basshysy.
Oqý ornyna túsip jatqan jas kýrsanttar elimizdiń ár túkpirinen kelgen. Solardyń biri Taraz qalasynyń týmasy Nurasyl Qurman jastaıynan ushqysh bolýdy armandaǵanyn aıtady. «Týystarymnyń ishinde áskerı adamdar bar. О́zim de jastaıymnan ushqysh bolǵym keldi. Oqýǵa túsý ońaı bolǵan joq. Biraq 40 kúndik irikteýden súrinbeı óttim. Mamandyǵym – jaýyngerlik basqarý ofıseri. Ushaqtardy basqaramyn», deıdi ol.
Táýelsizdik alǵaly beri áskerı ınstıtýt 2 700 ofıser daıarlap shyǵardy. Qazirgi kúni oqý orny zamanaýı avıasııalyq qural-jabdyqtardy qoldana otyryp, joǵary bilikti avıasııa mamandaryn daıarlap keledi. 2021 jyldan beri ınstıtýtta ushqyshsyz ushatyn apparattardy basqaratyn mamandar daıarlaý bastaldy.
