«Qazaqstan temir jolyn» tolyqqandy kólik-logıstıka kompanııasy etip qaıta qurý jumysyn jýyq arada aıaqtaý qajet. Sondaı-aq avtokólik joldarynyń qurylysy máselesi sheshimin tabýǵa tıis. Qazir onyń sapasy syn kótermeıdi. Tıisti jumystar ýaqtyly jáne sapaly jasalmaıdy. Jemqorlyq beleń alyp tur, báseke de joqtyń qasy. Munyń bári – osy salada ábden tamyr jaıǵan kemshilikter», degen Prezıdent olqylyqtardy joıý úshin naqty tapsyrma júktedi.
«Jyl sońyna deıin naqty sharalar qabyldaý qajet. Mindetin adal atqarmaǵan barlyq kompanııa zań boıynsha jaýapqa tartylady. Bul máselege men basa nazar aýdaramyn. Baqylaýdy kúsheıtip, jańa normatıvtik qujattar qabyldaý kerek. 2029 jylǵa deıin 4 myń shaqyrymnan astam jolǵa kúrdeli jóndeý júrgizý qajet», dedi Memleket basshysy.
Sonymen birge Prezıdent keleshekte Eýrazııa qurlyǵynda kólik-logıstıka órisi boıynsha iri memleketke aınalý qajet ekenin aıtty.
«Jalpy alǵanda, Qazaqstan Eýrazııa qurlyǵyndaǵy basty tranzıt haby retindegi rólin arttyrýy kerek. Osylaısha, ýaqyt óte kele kólik-logıstıka salasyndaǵy iri memleketke aınalýymyz qajet. Kólik-logıstıka salasyn qarqyndy damytý – bul strategııalyq mindet. Úsh jyl ishinde onyń ishki jalpy ónimdegi úlesi keminde 9 paıyzǵa jetýge tıis. Ol úshin salany tıimdi basqarý óte mańyzdy», degen Prezıdent Kólik mınıstrliginiń aıasyn keńeıtip, qaıta quryp, jol ınfraqurylymyn salý jumysy osy vedomstvonyń enshisine beriletinin aıtty.
