Foto: Ortalyq kommýnıkasııalar qyzmeti
Festıval 4-10 qyrkúıek aralyǵynda ótedi. Búgin dodanyń alǵashqy jarysy – kókpar oıyndary bastalyp ta ketti.
QR Ulttyq sport túrleriniń festıvali bıyl altynshy ret ótip jatyr. Atalǵan is-sharany bir jaǵynan 2024 jyly Astanada ótetin V Dúnıejúzilik kóshpendiler oıynynyń aldyndaǵy daıyndyq dese de bolady.
Asyq atý, aýdaryspaq, báıge, dástúrli sadaq atý, jamby atý, jekpe-jek, kókpar, qazaq kúresi, qusbegilik, teńge ilý, toǵyzqumalaq sııaqty 11 ulttyq sport túrinen 17 oblystan, 7 qaladan bas-aıaǵy 1362 sportshy tirkelgen. Odan bólek, 500-ge tarta sala mamandary bar.
«Bul syn sportshylardyń ǵana emes, elimizdiń barlyq óńirleri ózara baq synasatyn alań. Iаǵnı, festıval nátıjesinde elimizdegi ulttyq sportty joǵary deńgeıde damytyp otyrǵan úzdik úsh óńirdi anyqtaıtyn bolamyz», dep naqtylady spıker.
Onyń aıtýynsha, festıval baǵdarlamasyndaǵy barlyq oryndar balldyq júıemen eseptelip, birinshi orynnan jıyrmasynshy orynǵa deıin barlyq aımaqtardyń deńgeıi anyqtalmaq.
«Kezinde festıval baǵdarlamasynda qyz qýý degen ónerimiz de bolǵan. О́kinishke qaraı, sońǵy kezderi biz ony sport túrinen alyp, oıyn túrine qosyp otyrmyz», dedi B. Sábıtov.
Al ótken jyly ulttyq sport túrine dástúrli sadaq atý engizilgen.
Sondaı-aq Ulttyq jáne at sporty túrleri ortalyǵynyń basshysy festıvalge oblystardyń qatysý deńgeıine toqtalyp ótti. Jańadan qurylǵan Ulytaý jáne Abaı oblystarynan qatysýshylar tórt sport túrinen ǵana kelse, Almaty qalasy men Aqtóbe oblysynan 6 sport túrinen ǵana kelip otyr. Degenmen, B.Sábıtov ulttyq sport túrleriniń damýy qazirgi kezde birkelki sıpat alyp kele jatqanyn aıtty. Iаǵnı, elimizdiń tek qana ońtústigi emes, soltústigi, shyǵysy men batysynyń bárinde bir deńgeıde múmkindik bar.
B.Sábıtov jankúıer bolý arqyly adamdar ulttyq sporttyń damýyna úles qosa alatynyn atap ótti.
«Ulttyq sport jankúıerlerin búginnen bastap 10 qyrkúıekke deıin Qazanat ıppodromynda, Jaqsylyq Úshkempirov atyndaǵy jekpe-jek saraıynda, «Qazaqstan» jeńil atletıka manejinde, sondaı-aq «Aspan» sport kesheninde kútemiz», dep túıindedi ol.
