Foto: Anna Mavreshkonyń jeke muraǵatynan
Áleýmettik jeli arqyly kózimiz shalǵan erekshe vıdeo avtory Anna Mavreshkony sózge tartqan edik. Atyraýda týyp-ósken orys qyzy qazaqtyń barlyq salt-dástúrin jaqsy kóretinin aıtty. Mundaıda birden múmkin onyń kúıeýi qazaq shyǵar degen oı keledi. Joq. Ata-anasy da joldasy da orys. Tek onyń sińilisi qazaq jigitke turmysqa shyqqan-dy. Sóıtip olar qazaqpen quda bolǵaly ultymyzdyń túrli saltymen tanysqan kórinedi.
Anna Mavreshko sińilisi balaly bolyp, tusaýkeser rásimin jasaǵanda mán-maǵynasy mol dástúrdi óz balasy dúnıege kelgende jalǵastyrýdy nıet etken. Solaısha dúnıege eki qyz, bir ul ákelgen ana osy muratyna jetipti.
«Qyzdarym bir jasqa tolǵanda yrymdap, úıde ózimiz tusaýkeser rásimin jasaǵanbyz. Endi mine, kópten kútken ulymyz dúnıege kelip, onyń da tusaýyn qazaqy yrymmen kestirdik. Endi ǵana táı-táı basyp júrgen balam tusaýyn kestirgennen keıin nyq qadam basa bastady. Bunyń bir óz qudireti bar sııaqty. Taǵylymy mol dástúrdi keıin balalarymnyń da jalǵastyrǵanyn qalaımyn», dedi ol.
Anna jaı ǵana ádemi estelik retinde túsirilgen vıdeonyń áleýmettik jelide munsha tanymal bolyp ketetinin bilmedik deıdi. Jelide olarǵa jyly lebizin bildirip jatqandar kóp.
