Kýrsanttar ant berdi

Saltanatty is-sharaǵa Ulttyq ulan Bas qolbasshysynyń orynbasary, general-ma­ıor Baýyrjan Ábjanov, oblys ákimi appa­ratynyń basshysy Oljas Ydyrysov, qalalyq Ardagerler keńesi tóraǵasynyń orynbasary Imanǵalı Tatvaev, sondaı-aq óńirdegi kúshtik qurylymdardyń basshylary, ardagerler, bolashaq ofıserlerdiń ata-analary men týys­tary qatysty.

Jas sarbazdardy Ulttyq ulan Bas qol­bas­shysynyń orynbasary, general-maıor Baýyrjan Ábjanov quttyqtap, ásker qata­rynda el qorǵaýdyń mártebeli qyzmet ekendigin atap ótti.

«Sizderdiń árqaısyńyz mamandyqta­ryńyzdy sanaly túrde tańdadyńyzdar. Otan qorǵaý isine umtylyp, taǵdyr­laryńyzdy ofıserlik qyzmetpen baılanystyryp otyrsyzdar. Sondyqtan joǵary oqý ornynyń qabyrǵasynda áskerı qyzmet pen oqýdy qatar ala júrip, Ulttyq ulan akademııasynyń kýrsanty ataǵyn abyroımen arqa­laısyzdar degen senimdemin. Bas qolbasshylyq, Ulttyq ulannyń áskerı qyzmetshileri sizderge ofıserler korpýsynyń bolashaǵy retinde zor úmitpen qaraıdy. Biz sizderge laıyqty oqý jáne qyzmet kórsetý jaǵdaıla­ryn qamtamasyz etý úshin bárin jasaı­myz», dedi general-maıor. Budan ári oblys ákiminiń atynan apparat basshysy Oljas Ydyrysov kýrsanttarǵa tilekteri men quttyqtaýlaryn joldady.

«Memleket basshysy Qasym-Jomart Toqaev: «Ásker – memleketimizdiń tire­gi. Otanymyzdyń táýelsizdigi men tu­tas­tyǵyn qorǵaý – basty paryz. Ony batyr ata-babalarymyz ǵasyrlar boıy kózdiń qarashyǵyndaı saqtap, bizge mura etip qaldyrdy. Búgingi biz­diń basty mindetimiz – osy baǵasyz qun­dyly­ǵymyzdy joǵaltpaı, keıingi urpaqqa tabystaý», dep atap ótken bolatyn. Sizder tájirıbeli oqytýshylardyń, tálimgerlerdiń basshylyǵymen bola­shaqta Otanymyzdyń Qarýly kúshterinde joǵary bilikti jáne suranysqa ıe maman bolý úshin paıdaly bilim men daǵdyǵa ıe bolatyndaryńyzǵa senimdimin!» dedi Oljas Nurlanuly.

Is-sharada sóz alǵan 1-kýrs kýrsanty, qatardaǵy jaýynger Nurbol Dáýlet jıylǵan qaýymdy kýrsanttardyń áskerı antqa adal bolatynyna jáne Otan­dy qorǵaý jolynda babalar izin laıyqty jalǵastyratynyna sendirdi.

Barlyq jas kýrsant birqatar synaq­tan ótken bolatyn. Olar deneshynyq­tyrý normatıvterin oryndap, qabyldaý emtıhandaryn tapsyrdy, baıypty konkýrstyq irikteýden jáne jalpy áskerı daıarlyqtan ótti. Endi olardyń aldynda 4 jyl kýrsanttyq ómir bar. Osy jyldar ishinde áskerı istiń barlyq qyr-syryn ıgerip, Otannyń senimdi qorǵaýshylaryna aınalmaq.

Áskerı rásim ótkizilgennen keıin qo­naq­­­­­­­ta­r­­­ǵa akademııa áskerı qyz­met­shi­le­riniń qoıy­lymdary kórsetildi. Áskerı orkestr men ýnıversıtet barabanshylarynyń ansambli ózderiniń ónerimen jınalǵandarǵa kóńil kúı syılady. Serjant Aıan Qalı bastaǵan kýrsanttar karabındermen saptyq tásilder oryndap, defıle kórsetti.

Bul kúnderi Ulttyq ulan akademııasy quqyq qorǵaý organdarynyń joǵary bilik­ti ofıserleriniń ustahanasyna aınalyp úlger­gen. Sondaı-aq Ulttyq ulanǵa júktelgen mindet­terdi oryndaýǵa úlken úles qosyp keledi. Bul – eldegi áskerlerge ofıserlik kadrlar daıar­laýdy júzege asyratyn jalǵyz áskerı oqý orny. Ol 1997 jyly 18 naýryzda quryldy. 2022 jyldyń aqpan aıynan bastap ofıserler ustahanasyna akademııa mártebesi berildi.

26 jyl ishinde joǵary oqý ornyn 4 myń­nan astam ofıser bitirip shyqty. Olar Ulttyq ulannyń kadr qataryn tolyqtyryp qana qoımaı, eldiń basqa áskerleri men áskerı qurylymdarynda da qyzmet etip jatyr. Bir­qatary joǵary laýazymǵa taǵaıyndalsa, kóp­tegen ofıserge merziminen buryn áskerı ataqtar berildi.

Akademııa bazasynda segiz maman­dyq boıyn­sha ofıserler daıarlanady, oqytý on kafedra­da júrgiziledi. Munda joǵary oqý ornynan keıingi jáne qosymsha bilim berý fakýlteti jumys isteıdi. Úkimet­aralyq sharttarǵa sáıkes 2009 jylǵy qyrkúıekten bastap áskerı oqý ornynyń bazasynda jyl saıyn Tájikstan Respýb­lıkasynyń ókilderi óteýsiz negizde áskerı mamandyqty ıgeredi.

Aıta keteıik, bıyl akademııada magıstratýra baǵdarlamasy boıynsha JOO ofıser-tyńdaýshylary alǵash ret oqýǵa qabyldandy.