Kúni keshe Prezıdent Qasym-Jomart Toqaev «Jaǵalaý» oqý-jattyǵý polıgonynda ótken «Batyl toıtarys-2023» strategııalyq komandalyq-shtabtyq áskerı oqý-jattyǵý jıynyna qatysyp, Arnaýly operasııalar kúshteri men Desanttyq-shabýyldaý áskerleriniń daıyndyǵyn kózben kórgen bolatyn. Qazaqstan Respýblıkasy Qarýly Kúshteriniń quramyna kiretin Arnaýly operasııalar kúshteriniń qolbasshylyǵy Prezıdenttiń 2022 jylǵy 19 qańtardaǵy №779 Jarlyǵymen qurylyp, 3 aqpanda Memleket basshysynyń ókimimen Bolat Jorabaev onyń qolbasshysy laýazymyna taǵaıyndaldy.
Arnaýly operasııalar kúshteri eldiń qorǵanys qabileti men áskerı qaýipsizdigin qamtamasyz etý aıasynda, onyń ishinde terrorızmge qarsy operasııalarǵa jáne zańsyz qarýlanǵan qurylymdarǵa qarsy is-qımyl jasaýǵa qatysý arqyly arnaıy mindetterdi sheshýge arnalǵan.
Jańa bólinistiń qyzmet etip kele jatqanyna eki jylǵa jýyqtap qaldy. Osy ýaqyt aralyǵynda Qorǵanys mınıstrligi Memleket basshysynyń armııanyń jaýyngerlik qabiletin túbegeıli arttyrý jáne Qarýly kúshterdiń jumysyn qaıta qurý jónindegi tapsyrmasyn iske asyrý sheńberinde qurylǵan Arnaýly operasııalar kúshteri qolbasshylyǵynyń kúshteri men quraldar quramyn, mindetteri men fýnksııalaryn aıqyndady. Jyl boıy basqarý organdary men bólimshelerin quzyretti mamandarmen jasaqtaý, olardy zamanaýı tehnıkamen, qarý-jaraqpen jáne oqý-materıaldyq bazamen jaraqtandyrý jumystaryn júrgizdi.
Búgingi qazaq armııasy – el men jerdi tek syrtqy jaýdan ǵana emes, ishki qaýip-qaterlerden de senimdi qorǵaı alatyn alyp kúshke aınaldy. Arnaýly operasııalar kúshteri sonyń ishindegi eń zamanǵa saı jabdyqtalǵan qýatty qurylymdardyń biri.
