Sýretti túsirgen – Jangeldi Ábdiǵalym
Mektepke ornalasqan jas muǵalimder áýeli tórt satyly irikteýden ótip, Súleımen Demırel ýnıversıtetinde qaıta daıarlaý kýrsynda biliktiligin arttyrǵan. Solardyń qatarynda 21 jastaǵy Nazıra Keńesova da bar. Ol joǵary bilimdi Ábilqas Saǵynov atyndaǵy Qaraǵandy tehnıkalyq ýnıversıtetinen alǵan. Mamandyǵy – mashına jasaý ınjeneri. Biraq Nazıra ýaqyt óte jany muǵalim bolýdy qalaıtynyn túsinedi. Oqýyn oıdaǵydaı aıaqtaı salysymen, «Teach for Qazaqstan» jobasy týraly estip-bilip, baǵyn synap kórýdi uıǵarady.
– Jobanyń jarnamasyn áleýmettik jeliden kórdim. «Armanyńdy júzege asyr – muǵalim bol!» degendi oqyp, maǵan berilgeli turǵan taǵy bir múmkindik ekenin túsindim. Irikteýden ótken soń, Súleımen Demırel ýnıversıtetinen tereńdetilgen bilim aldym. Endi, mine jańa oqý jyly bastalǵaly beri Tórtkól aýylynyń tirek mektebinde matematıka jáne fızıka pániniń muǵalimi bolyp jumys istep jatyrmyn. Menińshe, ár adam óz mamandyǵyn súıýi kerek. О́zime balalarmen jumys isteý unaǵandyqtan, osy joldy tańdadym. Balalar sabaqqa belsene qatysyp, keri baılanys jasasa, tipti qýanamyn. Bizdiń bilim oshaǵy tirek mektebi bolǵandyqtan, mektepte ınklıýzıvti bilimge qatysty jobany júzege asyrýdy josparlap otyrmyn, – deıdi Nazıra.
Joba Arqalyqtyń da bir ulyn Arqaǵa alyp keldi. Jandos Aıdarhanov Astanadaǵy L.N.Gýmılev atyndaǵy Eýrazııa ulttyq ýnıversıtetiniń aqparattyq tehnologııalar fakýltetin bitirip, elordadaǵy iri kompanııada mamandyǵy boıynsha qyzmet atqarǵan. Alaıda Jandostyń da janyna ustazdyq etý jaqyn boldy. Onyń ózindik sebepteri de bar.
– Aldymda úlken mansap, perspektıva, berekeli ujymym bolsa da, jumysym kóńilime asa jaǵa qoımady. Úıdegilerdiń barlyǵy bilim salasynda qyzmet etedi. Sony kesh túsindim. Biraq eshten kesh jaqsy emes pe? Aǵam osy bir joba jóninde aqparat aıtty. Eki oıda júrgen men, birden qatysýǵa bel býdym. Sonyń nátıjesinde elimizdegi eń bedeldi Súleımen Demırel ýnıversıtetinde bilim alý baqyty buıyrdy. Sátti oqyp shyqqan soń, Ǵabıden Mustafın aýylyndaǵy mektepke ornalastym. Aýyl balalaryna bilim bergen unaıdy. Bul jerde meni qosqanda jobanyń bes túlegi bar, – deıdi Jandos.
«Teach for Qazaqstan» jobasyn «muǵalim mamandyǵyna búıirden kelý» deıdi qatysýshylar. Joba úzdik mamandardy, yntaly jastardy tańdap alyp, pedagog bolýǵa kásibı túrde shyńdaıdy.
– Joba bıyl iske qosyldy. Ázirge bizdiń túlekter Qaraǵandy oblysynyń mektepterine ǵana jumysqa ornalasty. Olardyń segizi – Buqar jyraý aýdanynyń, qalǵany Abaı, Shahtınsk, Balqash qalalarynyń mektepterin tańdady. Túlekterimiz elimizdiń joǵary oqý oryndaryn bitirgen, tórt kezeńdik irikteýden tolyq ótken. Irikteýge barlyǵy úsh myńǵa jýyq úmitker qatysty. Olardyń ishinen 49 talapkerdi tańdap aldyq. Súleımen Demırel ýnıversıtetinde qaıta daıarlaý oqý baǵdarlamasyn tek 30 maman aıaqtaı aldy, – deıdi «Teach for Qazaqstan» qoǵamdyq qorynyń dırektory Gúlnár Salmenova.
Eki jyldyq ádistemelik kómekpen qosa, joba túlekteri aı saıyn 300 myń teńge kóleminde shákirtaqy alady. Buǵan qosa mektepterde olarǵa arnaıy tálimgerler bekitiledi. Eki jyldan keıin jas mamandarda kez kelgen halyqaralyq ýnıversıtetke túsip, bilimin ári qaraı jetildirý múmkindigi qarastyrylǵan.
– Teach for Qazaqstan – bul álemniń 60-qa jýyq elinde tabysty iske asyrylyp jatqan «Teach Ǵor All» jahandyq jobasynyń bir bóligi. Kelesi jyly taǵy 100 qatysýshyny iriktep alyp, jumysty ári qaraı jalǵastyrý jospary bar. Osy arqyly pedagog tapshylyǵyn birjola joımasaq ta, biz daıarlaǵan mamandarmen kadr tapshylyǵyn áste-áste azaıta bermekpiz, – deıdi G.Salmenova.
Qaraǵandy oblysy
