https://www.akorda.kz/
«Prezıdent Qasym-Jomart Toqaev Nıý-Iork qalasyna jumys sapary aıasynda Ortalyq Azııa men AQSh memleketteri basshylarynyń sammıtine qatysty. Jıynda S5+1 seriktestigi arqyly ekonomıka, energetıka jáne qaýipsizdik salalarynda Ortalyq Azııanyń egemendigin, ornyqty damýyn jáne órkendeýin odan ári nyǵaıtý úshin birlesip jumys isteý máselesi talqylandy. Sammıtte Memleket basshysy Qasym-Jomart Toqaev AQSh Prezıdenti Djozef Baıdennen keıin sóıledi», delingen aqparatta.
Sammıtte Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov, О́zbekstan Prezıdenti Shavkat Mırzııoev te sóz sóılep, strategııalyq seriktestikti, saıası dıalogty, saýda-ekonomıkalyq, ınvestısııalyq jáne gýmanıtarlyq salalardaǵy yntymaqtastyqty odan ári damytý, Eýrazııa qurlyǵyndaǵy beıbitshilik pen turaqtylyqty saqtaý máseleleri jan-jaqty talqylandy. Sammıtte ekonomıkalyq yntymaqtastyq máselesine, sondaı-aq amerıkalyq kompanııalardyń mańyzdy qazba baılyqtardy ıgerý, jańartylatyn energııa kózderi, óńdeý ónerkásibi jáne basqa da baǵyttardy damytý múmkindikteri aıtyldy.
S5+1 formatyndaǵy sammıtte qaýipsizdik problemalaryn, sonyń ishinde kıberqaýipsizdik, terrorızm, ekstremızm, zańsyz mıgrasııa jáne esirtki tasymaly sekildi qaýip-qaterlerdi sheshý úshin yntymaqtastyqty nyǵaıtýǵa da basa mán berildi.
Prezıdent Q.Toqaev óz sózinde keleshekte Almaty qalasynda Ortalyq Azııa men Aýǵanstan úshin BUU-nyń Ornyqty damý maqsattary jónindegi aımaqtyq ortalyǵyn ashý isinde AQSh tarapynyń qoldaýyna senim artatynyn jetkizdi.
