Foto: nvdaily.ru
Depýtattyń aıtýynsha bul saýal ózge elde zańsyz mıgrant atanyp, quqyǵy qorǵalmastan qaýip qaıdan keledi dep jáýteńdep otyrǵan 20 myńnan astam qazaq balasynyń aryzy ispetti. Arqa jaıly bolsa arqar aýyp nesi bar, delingen maqaldaǵydaı jalaqyǵa jarymaı, tabaqtaı dıplomyna laıyqty jumys tappaǵan qazaq jastary qazir álemniń ár túkpirinde qara jumys istep júrgeni málim.
Resmı derek boıynsha 2022 jyly elimizdiń 9 600 azamaty Ońtústik Koreıada eńbek mıgranty bolyp jumys istegen. Al otandastyrymyzdyń basyn biriktiretin ortalyqtardyń dereginshe qazir Ońtústik Koreıada 20 myńnan astam otandasymyz júr.
«Zańsyz júrgen eńbek mıgrantynyń jaǵdaıy túsinikti. Mysaly, 57 jastaǵy otandasymyz Ońtústik Koreıaǵa eńbek mıgranty bolyp baryp, kóz jumǵan kezde, onyń denesin ákelý úshin bala–shaǵasy jurttan jylý jınap ketkeni esimizde. Odan bólek sol eldegi óndiris oryndarynda qolynan aıyrylǵan, basqa da jaraqattar alǵan otandastarymyzdyń aryzdary aıtylyp jatyr. Sebebi olarǵa eshkim eshqandaı ótemaqy tólemeıdi, qajet dese, jumys berýshi olardy zańsyz eńbek mıgranty retinde quzyrly oryndarǵa ustatyp jibere alady», dedi Nartaı Sársenǵalıev.
Depýtattyń paıymynsha, otandastarymyzdyń quqyǵynyń qorǵalmaý sebebi ekijaqty kelisimshart negizinde beriletin «E 9» ýaqytsha eńbek vızasynyń bolmaýy. Memleket basshysy 2020 jyly qazan aıynda birqatar elde otandastarymyz jasyrynyp zańsyz jumys istep jatqandyǵyn, «mundaı jaǵdaıda ózge elde tirkelý qıyndyqtary men túrli turmystyq qıyndyqtarǵa tap bolady», dep Úkimetke máseleni sheshýdi shegelep tapsyrǵan bolatyn. Biraq áli kúnge deıin bul túıtkildiń túıini tarqaǵan joq.
Koreıamen 16 el eńbek ruqsattary júıesi atty sheteldikterdi jumysqa ornalastyrý júıesine qosylǵan, atalǵan júıege Qazaqstan áli qosyla almaı keledi.
Nartaı Aralbaıulynyń sózinshe Ońtústik Koreıa Úkimeti Qazaqstannyń kóptegen suraýlaryn eskere otyryp, eńbekke rursat berý júıesine Qazaqstan Respýblıkasyn engizý máselesin qaıtadan qarastyryp, tıisti kelissózderdi júrgizýge daıyn ekendikterin jetkizgen. Qajet bolǵan jaǵdaıda tıisti mamandaryn jiberip, ádistemelik kómek kórsetýge de daıyn. Koreıa tarapynan kelip túsken hatta Qazaqstandy eńbekke ruqsat berý júıesine engizýge qatysty qoıylatyn naqty sharttar da kórsetilgen.
«Biraq elimizde jaýapty oryndardyń máseleni sheshýge qulqy kórinbeıdi. Atalǵan máseleni retteıdi degen úmitpen arnaıy kóshi–qon komıteti de qurylyp edi. Biraq olardyń osy baǵyttaǵy nátıjeli jumysyn kórmedik. Búginge deıin eki el arasynda jeti kelissóz júrgizilgen. Áli nátıje joq. Al, Ońtústik Koreıada kózi jáýdirep myńdaǵan qazaq balasy otyr», dedi depýtat.
Depýtat saýaly naqty eki suraqpen jáne eki usynyspen túıindelgen.
«Suraqtar: Qazaqstan qashan eńbekke ruqsat berý júıesine enedi? Otandastarymyz Ońtústik Koreıada qashan zańdy túrde eńbek ete alady? Usynystar: 1) Qazaqstandy eńbekke rursat berý júıesine qosý úshin tıisti is–sharalar josparyn jedel pysyqtaýdy tapsyramyz. 2) Eki el arasynda ortaq kelisim jasalǵansha Ońtústik Koreıaǵa zańsyz eńbek mıgranty bolyp júrgen 20 myńǵa jýyq otandastyrymyzdyń quqyǵyn qorǵaıtyn zańdy tetikti neǵurlym tez tabý qajet. Atalǵan depýtattyq saýalǵa zańnamada belgilengen merzim ishinde jazbasha jaýap kútemiz», dedi «Amanat» partııasy fraksııasynyń múshesi Nartaı Sársenǵalıev.
