Sýretterdi túsirgender – Salı Sabırov, Turar Qazanǵapov (Sportty damytý dıreksııasy)
Azııa oıyndarynyń rekordy tirkeldi
Joǵaryda aıtqan stend atýdyń skıd baǵdarlamasy boıynsha quramynda Ásem Orynbaı, Zoıa Kravchenko jáne Olga Panarına óner kórsetetin bizdiń komanda jalpy 350 upaı jınap, jarys rekordyn jańartty.
Al jekeleı saıysta Ásem Orynbaı qola júldege qol jetkizdi. Osy jeńisten keıin Týrızm jáne sport mınıstri Ermek Marjyqpaev sportshylardy quttyqtap, aldaǵy ýaqytta sportshylarymyzdyń alatyn altyn medaldary kóp bolatynyna senim bildirdi.
53 jastaǵy chempıon
Stend atýdyń skıd baǵdarlamasynda altyn ıelengen úsheýdiń biri Olga Panarına ekenin aıttyq. Ol – 53 jasta. Azıadanyń sý jańa chempıony men rekordshysynyń nemeresi ósip keledi.
– Birinshiden, kóp jattyǵamyn. Ekinshiden, sportshylar qartaımaıdy. Nysana kózdeý – bul meniń ómirlik isim. Sondyqtan oǵan árqashan kúsh tabylady. Komandalastaryma alǵys aıtqym keledi. Menen keńes suraǵandarǵa, árqashan kómektesýge tyrysamyn. Ujymymyz óte tatý. Menińshe, bul jeńis – osy komandalyq rýhtyń jemisi. Bul medalimdi ata-anama arnaǵym keledi. Olar árqashan menimen birge, – dedi O.Panarına.
Eki dúrkin qola júldeger
Hanchjoýdadaǵy dodada otandasymyz Ádilbek Mýsın qola júldeger atandy. Ol 100 metrge batterflıaı ádisimen júzýden úzdik úshtikke endi. Kórsetkishi – 51.86 sekýnd. Altyn medaldi japondyq Kasýhıro Masýmoto (51.13), kúmisti qytaılyq Changhao Vang (51.24) jeńip aldy.
Aıta ketelik, bul Ádilbektiń jetik meńgergen qashyqtyǵy sanalady. Bizdiń sportshy osymen júzýden Azııa oıyndarynyń ekinshi qolasyn ıelenip otyr. Buǵan deıin ol Indonezııada ótken Azıadada komandalyq estafetadan júlde alǵan-dy.
Namysty qyz jeńimpazdar qatarynda
Jazǵy Azıadada qazaq qyzy Tursyn Aıan ý-shýdan qola júldeger atandy. 52 kıloǵa deıingi salmaqtyń jartylaı fınalynda otandasymyz jarys qojaıyny Iýeıao Lıge ese jiberdi.
– Utylyp qalǵanyma namystanyp turmyn (jylap jiberdi). Qarsylasym álem chempıony, dárejesi joǵary ekeni kórinip tur. Aldaǵy jarystarda altyn alý úshin daıyndalyp kelemin. Munymen toqtap qalmaımyz. Azııa oıyndary meniń armanym edi. Osy jarysqa qatysyp, armanym oryndalǵanyna qýanyshtymyn. Dodaǵa qatysýǵa sebepker bolǵan jandarǵa, bapkerlerge alǵysym sheksiz, – dedi sportshy.
Qytaıdyń ulttyq sporty ý-shýdyń sanda túri Azııa oıyndarynyń baǵdarlamasynda 1998 jyldan (erler) bar. Áıelderdiń básekesi 2010 jyly qosyldy. Názikjandylar eki salmaqta (52 kg, 60 kg), erler bes salmaqta (56 kg, 60 kg, 65 kg, 70 kg, 75 kg) júldelerdi sarapqa salady.
Shahmatshylardan qaıyr bolmady
Jazǵy Azııa oıyndarynda shahmattan Qazaqstan namysyn álemde myqty sanalatyn Bıbisara Asaýbaeva men Jansaıa Ábdimálik qorǵaǵan edi. Alaıda chempıon qyzdardan qaıyr bolmady. Bıbisara jarysty 5-orynmen, Jansaıa 8-orynmen támamdady.
Áıelder arasyndaǵy básekede Qytaı qyzdary altyn men qolany ózara bólisse, kúmisti О́zbekstan ókili ıelendi. Erler arasyndaǵy básekede Qazybek Nógerbek – 10, Rınat Jumabaev 16-orynnan kórindi.
Áıtkenmen, Qazaqstan shahmat federasııasynyń atqarýshy dırektory Gúlmıra Dáýletovanyń aıtýynsha, komandalyq jarysta qyzdarymyz úzdikter sapynan kórinedi.
– Komandalyq jarysta júlde alýǵa qyzdarymyzdyń shamasy jetedi. Qazir komandadaǵy bes shahmatshymyz osynda keldi, daıyndyq ústinde. Buıyrtsa, júlde alamyz dep otyrmyz, – dedi G.Dáýletova.
Boksshylar jarap tur
Qyzdarymyz da, uldarymyz da ázirshe jeńilissiz kele jatyr. Keshe bizdiń boksshylardan birinshi bolyp eki dúrkin álem chempıony Nazym Qyzaıbaı rıngke kóterildi. Áıelder arasyndaǵy 50 kılo salmaqta baq synap jatqan otandasymyz nepaldyq Tamang Sýsmany aıqyn basymdyqpen jeńip (5:0), kelesi aınalymǵa shyqty.
– Shúkir, birinshi jekpe-jekti jeńispen bastadym. Endi alda taǵy kezdesýler bolady. Jeńiske jetýge umtylamyn. Bul jerge eshkim jeńilý úshin kelmeıdi ǵoı. Ár kezdesýge tolyqtaı daıyndalyp júrmin. Jeńip jatqannan keıin bapkerlerim «asyqpaı qımylda» dedi. Úsh raýnd boıy jaqsy óner kórsettim dep oılaımyn. Kelesi qarsylastarym eki jekpe-jek ótkizip úlgergen. Búgin birinshi kún qıynyraq bolady dep oılap edim. Ádette, alǵashqy jekpe-jek ár kez qıyn bolady ǵoı. Biraq daıyndyǵymnyń arqasynda sharshamadym. Biz ár jarysqa úlken eńbekpen kelemiz. Azııa oıyndarynda biz úshin lısenzııa beriledi. Sondyqtan buǵan psıhologııalyq turǵyda daıyndaldyq. Eń basty maqsat – lısenzııa jeńip alý. Bárin ýaqyt kórsetedi, – dedi boksshy.
Otandasymyz Saǵyndyq Toǵambaı da Azııa oıyndaryn jeńispen bastady. Ol mońǵolııalyq qarsylasyn merziminen buryn jeńdi. 92 kıloda synǵa túsken Saǵyndyq Barıahaan Dorjpendi alǵashqy eki raýndta eki ret nokdaýnǵa túsirdi.
О́zbekstandyq qazaq jarysty erte aıaqtady
63,5 kıloda synǵa túsken Ertýǵan Zeınýllınov 1/8 aınalymda tájikstandyq boksshy Bahadýr Osmonovpen qolǵap túıistirdi. Bahadýr – Tashkentte ótken álem chempıonatynyń qola júldegeri jáne 2019 jylǵy Azııa chempıony. Eki boksshy arasyndaǵy kezdesý óte tartysty ótti. Jekpe-jek bastalysymen ekeýiniń de qabaǵy jarylyp, dárigerler eki sportshyǵa da birneshe ret kómek kórsetti. Sondaı-aq eki boksshy da bir-birden nokdaýn aldy. Tóreshiler tartysty kezdesýde 3:2 esebimen jeńisti qazaq balasyna berdi.
Álem chempıonaty demekshi, 2023 jylǵy álem birinshiliginiń jeńimpazy Rýslan Abdýllaev Azııa oıyndaryn erte aıaqtady. Ol mońǵolııalyq Baatarsýhıın Chınzorıgke ese jiberdi. Rýslan mońǵol boksshysyn álem chempıonatynyń fınalynda basym túsken edi. Bul joly 0:5 esebimen jeńilis tapty.
