Bıyl jyl basynda Astanada dál osy «World Athletics Indoor Tour» sanatyndaǵy jarystyń Kúmis deńgeıli «Astana Silver Grand Prix Meeting» týrnıri uıymdastyrylǵan bolatyn. Osylaısha, 2016 jyly tusaýy kesilgen jelaıaqtardyń jarysyn bıyl TMD elderi arasynda birinshi bolyp Qazaqstan astanasy qabyldaǵanyn da aıta ketken jón. Álemge áıgili «Gaýhar lıgasynyń» jabyq keshendegi balamasy retinde ótkizilip kele jatqan Astanadaǵy jarysta álemniń 15 elinen kelgen 100-ge jýyq sportshy baq synaǵan-dy.
2022 jyly halyqaralyq týrnır jarys aıasyn keńeıtip, jelaıaqtar básekesin tórt deńgeıge, ıaǵnı Altyn, Kúmis, Qola jáne Úmitkerler sanatyna bólip ótkize bastady. Bul saıystar jarysty uıymdastyrý deńgeıimen jáne júlde qorymen erekshelenedi.
Ortalyq kommýnıkasııalar qyzmetinde ótken baspasóz máslıhatynda Qazaqstan jeńil atletıka federasııasynyń atqarýshy dırektory Pavel Kýkın atalǵan jarys 2024 jyldyń 27 qańtarynda Astanadaǵy «Qazaqstan» jeńil atletıka sport kesheninde ótedi dep josparlanǵanyn málimdedi.
«Qazaqstan 2024 jyly INDOOR tour Gold LEVEL serııasynyń jarystaryn qabyldaýǵa daıyn. Jarys 2024 jyldyń 27 qańtarynda «Qazaqstan» jeńil atletıka ortalyǵynda ótedi. Elimizdiń atletteri osyndaı halyqaralyq iri dodalarǵa qatysý arqyly álemdegi eń myqty sportshylarmen saıysýǵa múmkindik alady. Týrnırdiń júlde qory 100 000 dollarǵa jetedi. Jarys jeńil atletıkanyń 12 túri boıynsha ótedi. Atap aıtqanda, Altyn deńgeıli dodalarda erler 400, 1 500 jáne 60 metrge kedergiler arqyly júgirý, uzyndyqqa jáne bıiktikke sekirý boıynsha jaryssa, áıelder 60, 800, 3 000, 5 000 metrge júgirý, syryqpen sekirý, úsh qarǵyp sekirý jáne ıadro laqtyrý saıystary boıynsha bas júldeni sarapqa salady», dedi P.Kýkın.
Alty kezeńnen turatyn kelesi jylǵy «World Athletics Indoor Tour Gold Level» jarysynyń shymyldyǵyn Qazaqstan astanasy ashyp beredi. Astanadan keıin bul jarystar Boston, AQSh (3 aqpan, 2024), Torýn, Polsha (6 aqpan, 2024), Leven, Fransııa (10 aqpan, 2024), Nıý-Iork, AQSh (11 aqpan, 2024), Madrıd, Ispanııa (22 aqpan, 2024), Bırmıngem, Ulybrıtanııa (24 aqpan, 2024) qalalarynda jalǵasyn tabady. Reıtıngtik upaılar ár sanat boıynsha úzdik shyqqan tórt sportshyǵa beriledi.
Pavel Kýkınniń aıtýynsha, mundaı deńgeıdegi jarystardy ótkizý otandyq jelaıaqtardyń áleýetin baıqaýǵa, halyqtyń jeńil atletıkaǵa degen qyzyǵýshylyǵyn arttyrýǵa kómektesedi.
«Keıingi tórt jylda elimizdiń jelaıaqtary 60-tan astam rekord ornatty. Bul nátıjeler bizdiń sportshylardyń deńgeıi ósip kele jatqanyn kórsetedi. Ulttyq chempıonattarǵa qatysatyn sportshylar sany 30%-ǵa ósti. Osy faktilerdiń barlyǵy Qazaqstannyń jeńil atletıkasyn damytýda tańdaǵan jolynyń durys ekenin bildiredi», dedi jeńil atletıka federasııasynyń atqarýshy dırektory.
