Búgin Izraıl memleketi Palestına tarapynyń jappaı zymyran atýyna baılanysty, Gaza sektorynda áskerı operasııany bastady. Bul týraly áskerdiń baspasóz qyzmeti habarlady. Izraıldiń ondaǵan joıǵysh ushaǵy HAMAS uıymynyń nysandaryna soqqy berdi.
«Biz jaı ǵana áskerı operasııa jaǵdaıynda emes, soǵys jaǵdaıyndamyz», dedi Izraıl premer-mınıstri.
Sondaı-aq HAMAS osy áreketi úshin jaýap beretinine ýáde berdi. Benıamın Netanıahý sonymen qatar áskerılerge qalalardy palestınalyq sodyrlardan tazartýdy buıyrdy.
Buǵan deıin Izraıl qorǵanys mınıstri Ioav Galant Gaza sektorynan senbi kúni tańerteń bastalǵan zymyrandyq shabýyldarǵa baılanysty Izraıldiń ortalyǵy men eldiń ońtústiginde «arnaıy qaýipsizdik jaǵdaıyn» engizýdi buıyrdy. Bul týraly Qorǵanys mınıstrliginiń baspasóz qyzmeti habarlaǵan edi.
Izraıl qorǵanys qurylymdarynyń basshylyǵymen birge Gaza sektorynan 0-den 80 shaqyrymǵa deıingi radıýsta Izraıl tylynda «erekshe qaýipsizdik jaǵdaıyn» jarııalady.
Buǵan deıin Izraıl armııasynyń baspasóz qyzmeti Palestına anklavynan Izraıl aýmaǵyna zymyran atylǵanyn rastaǵan bolatyn. Eldiń kóptegen eldi mekenderinde, sonyń ishinde Tel-Avıv aımaǵy men onyń tóńireginde dabyl úzdiksiz soǵyldy. Bolyp jatqan jaǵdaıdyń aıasynda Izraıl armııasy «soǵysqa ázirlik jaǵdaıyn» jarııalady, al eldiń Qorǵanys mınıstri Ioav Galant rezervke áskerlerdi jınaýǵa kiristi.
Jergilikti basylymdar, onyń ishinde «Times of Israel» gazeti «Gaza sektorynan lańkesterdiń buryn-sońdy bolmaǵan tosyn shabýyly Izraılge júzdegen zymyran atýdan bastaldy» dep jazdy. Aımaqtyq aqparat quraldarynyń habarlaýynsha, palestınalyq qarýly toptar Izraılge 5 myń zymyran atqylaǵan.
Jergilikti aqparat quraldarynyń habarlaýynsha, Izraıldegi qaqtyǵystan keıin qaza tapqandar sany 20-dan asty, 300-ge jýyq adam jaralanǵan.
Sondaı-aq Izraıl telearnasynyń habarlaýynsha, lańkester Izraıldiń ońtústiginde adamdardy kepilge alyp jatyr.
Palestına qozǵalysynyń qarýly qanaty Izraıl aýmaǵyndaǵy operasııa kezinde 35-ke jýyq ızraıldik áskerıler men qonystanýshylar tutqynǵa alynǵany týraly málimdeme jasady.
