Kólik mınıstrligi Avtomobıl joldary komıtetiniń tóraǵasy Tólegen Abdýllın mınıstrlik pen ákimdikter ázirlegen is-qımyl josparyn baıandady.
Qazaqstandaǵy jergilikti mańyzy bar avtojoldar men eldi mekender kósheleriniń jalpy uzyndyǵy 131 myń shaqyrymdy quraıdy, onyń 70 myń shaqyrymy – oblystyq jáne aýdandyq joldar.
Bıyl jergilikti mańyzy bar avtojoldar men eldi meken kóshelerin kútip ustaýǵa jergilikti bıýdjetten 76 mlrd teńge bólindi. 270 arnaıy kommýnaldyq mekeme tartyldy. Arnaıy tehnıkanyń 9,6 myń birligi men 22 myń jol qyzmetkerin jumyldyrý kózdelgen.
Qys mezgilinde qaýipsiz jáne úzdiksiz jol qozǵalysyn qamtamasyz etý úshin 13 myń tonna janar-jaǵarmaı jáne 332 myń tonna kóktaıǵaqqa qarsy materıaldar ázirlendi. Atap aıtqanda, 51 myń tonna tuz, 141 myń tonna qum, 139 myń tonna untaq, 804 tonna reagent, 2,3 myń tonna benzın, sondaı-aq 10,3 myń tonna dızel otyny.
Kólik mınıstrligine qarasty Avtomobıl joldary komıtetiniń tóraǵasynyń aıtýynsha, oblystar men Almaty jáne Shymkent qalalarynyń ákimdikteri IIM jáne TJM aýmaqtyq bólimshelerimen kelisilgen Jol kartalaryn bekitti. Qazirgi ýaqytta óńirlerde osy baǵyttaǵy jumystar kúsheıtilgen.
Keńes qorytyndysy boıynsha Premer-mınıstrdiń birinshi orynbasary qajetti qarajatty qarastyra otyryp, avtomobıl joldaryn daıyndaýǵa baqylaýdy kúsheıtý boıynsha birqatar tapsyrma berdi. Ishki ister jáne Tótenshe jaǵdaılar mınıstrlikterine qolaısyz kún raıy jaǵdaılarynda kólik quraldarynyń qaýipsiz jáne úzdiksiz júrýin qamtamasyz etý boıynsha aýmaqtyq bólimsheler men jergilikti atqarýshy organdardyń ózara is-qımylynyń naqty algorıtmin belgileý tapsyryldy.
