Sýretter Arýjan Álimbetovanyń Instagram paraqshasynan alyndy
Shetelde eńbek etip júrgen qarakóz qyzymyz nebári 24 jasta. Qyzylorda oblysy Baıqońyr qalasynda týyp-ósken. О́zi Almatydaǵy QazUÝ-dyń túlegi. «Aýdarma isi» mamandyǵy boıynsha bilim alǵan. Alǵashynda Air Astana kompanııasynda eki jyldaı ýaqyt jumys istep, bıyl Emirates-ke ornalasty. О́sken óńirden jyraqqa ketý úıiniń jalǵyz qyzyna ońaı emes árıne. Bar jaqsyny balam kórsin deıtin anasy úlken qoldaý bildiripti. Sóıtip qazir Arýjan Dýbaıdaǵy ómirge tolyq beıimdelgen.
«Dýbaı – óte qaýipsiz, taza ári zamanaýı qala. Mundaǵy turǵyndardan ózara syılastyqty úırendim. Kez kelgen ult ókiline dostyq yqylaspen qaraıdy. Asyqqan adamdy kórmeısiń. Halqy tártipke baǵynǵan, urlyq joq. Bir jerde qaldyryp ketken zatyńa eshkim tıispeıdi. Tún ortasynda jalǵyz dúkenge barý da qorqynyshty emes. Sómkeń aýyr bolsa dúken qyzmetkerleri zatyńdy úıińe deıin aparyp berýge bar», dedi A.Álimbetova. Onyń bul qalada turyp jatqanyna segiz aı boldy. Jańa jerge tezirek úırenisýine álbette súıikti isiniń yqpaly kóp.
Ol bul kompanııaǵa talaı kezeńnen turatyn irikteýden ótip keldi. Sheteldik kompanııanyń Almatyda ótkizgen irikteýine 76 adam qatysyp, sonyń jeteýi synaqtan súrinbeı ótti. Arýjan sonyń biri.
«Úlken áýekompanııa bolǵandyqtan ártúrli elderge sapar shegedi. Ekıpajda árdaıym ártúrli ult ókilderi bolady. Sol sebepti kompanııa túrli tulǵalardy izdeıdi. Bizdegi bortserikterdiń árqaısysy ártúrli minezdi. Bárimizdi dostyq uıystyrady», deıdi bortserik qyz.
Kompanııa qyzmetkerlerdiń densaýlyǵyna jiti kóńil bóledi. Irikteýden ótken olar eń áýeli medısınalyq tekseristen ótken. 2 aı ýaqytty aǵylshyn tilin jetik meńgerýge arnaǵan. Budan soń avıasııaǵa qatysty teorııalyq bilimdi jetildirip, bortserik qyzmetine kirisken. Qyzmetkerler alty aı ýaqyt synaq merziminde júredi. Bul mezette tájirıbeli bortserikter jańa jumyskerlerge túsinistikpen qarap, kómegin aıanyp qalmaıdy.
Kompanııa qyzmetkerlerdiń jumys isteýine, jaıly ómir súrýine bar jaǵdaıdy jasap qoıǵan. Turatyn tegin úı, ekıpajǵa arnalǵan kólik degen syndy muqtajdyqtardyń barlyǵy qarastyrylǵan. Arýjan bul qyzmetin álemniń ár túkpirine taban tıip, túrli órkenıetpen tanysa alatyny úshin de jaqsy kóredi. Búginde ol 22 elde bolypty. Ár saıahattan jańa emosııa, kúsh alamyn deıdi ol.
Sheteldegi qomaqty jalaqy men jaıly ómirge úırengen jastardyń otanyna oralmaı qalyp jatqan mysaly kóp. Osy oraıda Baıqońyrda týǵan qyz: «Otan ottan da ystyq. Túbi bir kúni elge oralatynymdy bilemin», deıdi.
