Áıelder bıznesin qoldaý baǵytynda KMF kompanııasy men «KMF-Demeý» korporatıvtik qorynyń baǵdarlamalary jeterlik jáne olar qarjylandyrýmen ǵana shektelmeıdi. 2018 jyly KMF «Áıelderdiń múmkindikterin keńeıtý qaǵıdattaryna» qol qoıý arqyly BUU Áıelder halyqaralyq qurylymynyń bastamasyn qoldady. Sol jyly áıelder kásipkerligin qoldaý baǵdarlamasy ázirlendi.
KMF basqarma tóraǵasy Shalqar Júsipovtiń aıtýynsha, 90-jyldardyń ekinshi jartysynda áıelder bıznesin qarjylandyrýshylar az edi. Osy jyldar ishinde «KMF-Demeý» qory kásipker áıelderge arnalǵan túrli konferensııalardy uıymdastyrdy. Eýropalyq qaıta qurý jáne damý banki osyndaı toǵyzynshy is-sharanyń seriktesi boldy. Nátıjesinde, munyń bári bıyl úshinshi ret ótkizilgen «KMF Isker Hanymy» ulttyq jobasyna aınaldy. Ol mıkrobızneske qatysýshylar úshin taǵaıyndalǵan, maqsaty – óz salasynda úzdik bolyp sanalatyn kásipker áıelderdi yntalandyrý, sondaı-aq jalpy áıelder kásipkerligin damytýǵa nazar aýdarý jáne jańa klıentter arasynda KMF-ke senimdi arttyrý.
«Biz «KMF-Demeý» qorymen birlesip, bul baıqaýdy aldaǵy ýaqytta da ótkize berýdi josparlap otyrmyz. Sebebi úmitkerler arasynda úlken belsendilik baryn baıqadyq. Bıylǵy ótinishter sany ótken jylǵymen salystyrǵanda kóp boldy. Sonymen qatar osy jyly «Shaǵyn jáne orta bıznesti damytýǵa qosqan úlesi úshin» jańa atalymyn qosyp otyrmyz. Demek, bul klıentterimizdiń tek mıkrokásipkerlik aıasynda ǵana ósip, damyp kele jatpaǵanyn kórsetedi. Jobamyzdyń jyl saıyn jańalyǵy bar, jylda qosymsha júldeler taǵaıyndap, halyqaralyq sarapshylardy qazylar alqasyna shaqyramyz», deıdi Shalqar Júsipov.
Osylaısha, ótken aptanyń sońynda KMF Isker Hanymy – 2023 baıqaýynyń jeńimpazdaryn marapattaý saltanaty boldy. Bıyl baıqaýǵa qatysýǵa elimizdiń túkpir-túkpirinen 2 myńnan asa ótinish kelip túsken. Baıqaýdyń jeńimpazy jáne bas júlde – 1 mln teńge sertıfıkatynyń ıegeri – taldyqorǵandyq Anar Isaeva. Ol 17 jyldan beri áleýmettik bıznespen aınalysyp, «Aqjanel» medısınalyq-ońaltý ortalyǵyn basqaryp júr. Bul ortalyq ýaqyt óte kele ınsýlttan keıingi emdeýge ǵana emes, sonymen qatar serebraldy sal aýrýy bar jáne múmkindigi shekteýli adamdarǵa da kómektesýge mamandanǵan. 6 jyldan beri KMF klıenti bolyp kele jatqan Anar Isaeva bul qarjylandyrýdyń kómegimen ortalyqty jańǵyrtyp, jańa jumys oryndaryn ashyp, birqatar mańyzdy áleýmettik jobany júzege asyra aldy.
KMF Isker Hanymy – 2023 baıqaýynyń negizgi atalymdary boıynsha Talǵar qalasynda sulýlyq jáne densaýlyq ortalyǵyn ashqan Anjelıka Semenovaǵa «Bıznesti damytýǵa qosqan úlesi úshin», Merke aýylynda mal ustap, qymyz óndirgen Ulbosyn Qonaqbaıǵa «Agrobıznesti damytýǵa qosqan úlesi úshin», qyzylordalyq Baıan Toqsanbaevaǵa «ShOB-ty damytýǵa qosqan úlesi úshin», taldyqorǵandyq Sılvana Bekıshevaǵa «Áleýmettik bıznes» úshin, Talǵarda korreksııalyq ortalyq ashqan, sóıleý qabiletinde kemistik bar balalarmen jumys isteıtin Lola Saǵıtovaǵa «Ádil qazylardan arnaıy syılyq» retinde 500 myń teńgeniń sertıfıkattary tabys etildi. Sonymen qatar qosymsha atalymdar boıynsha 15 isker áıelge 100 myń teńgeden buıyrdy.
QNRDA-nyń mıkroqarjylyq qyzmetti júzege asyrý quqyǵyn beretin 26.02.2021 jylǵy №02.21.0003.M lısenzııasy
