Jambyl oblysynyń aýyl sharýashylyǵy óndirýshileri bıyl sýarmaly sý tapshylyǵy men temperatýranyń qalyptan tys bolýyna baılanysty qatty zardap shekti. Bul daqyldardyń ónimdiligine áser etkeni sózsiz. Bıylǵy jyldyń tamyz aıynda «QazAgroQarjy» agrarshylarǵa eginniń óspeýinen týyndaǵan qarjylyq qıyndyqtardy eńserýge kómektesý maqsatynda qarjy lızıngi sharttaryn qaıta qurylymdaýǵa jáne uzartýǵa ótinimder qabyldaýdy qolǵa aldy.
Jambyl oblysy boıynsha «QazAgroQarjy» AQ fılıalynyń dırektory Janar Ismaılova-Esjanova qazirgi klımattyq jaǵdaıda agrarshylardy qoldaýdyń mańyzdylyǵyn atap ótti. «Biz qolaısyz aýa raıynan zardap shekken klıentterimizge ózderiniń qarjylyq lızıng sharttaryn qaıta qurylymdaýǵa jáne uzartýǵa múmkindik beremiz. Bul – óńirdegi aýyl sharýashylyǵyn qoldaý jolyndaǵy mańyzdy qadam», dedi J.Ismaılova-Esjanova.
Qazirgi jaǵdaı boıynsha Jambyl oblysy fılıalyna sharttardy qaıta qurylymdaýǵa jáne uzartýǵa 15 ótinim kelip tústi, onyń 6-aýy maquldandy. 1 ótinim medıasııa boıynsha maquldanǵan, al qalǵandary qaralyp jatyr. Buǵan deıin «QazAgroQarjy» turaqsyzdyq aıybyn esepten shyǵarý jónindegi aksııany iske qosqan, sondaı-aq «О́z jemshóbimiz» baǵdarlamasy sheńberinde 2024 jylǵy 1 naýryzǵa deıin avansty tóleýdi keıinge qaldyrý múmkindigin berip, jem óndirý úshin aýyl sharýashylyǵy tehnıkasyn lızıngteý jónindegi arnaıy sharttardy usynǵan bolatyn. Bul sharalar agrarlyq sektordy qoldaýǵa baǵyttalǵan jáne aýyl sharýashylyǵy óndirýshilerine óńirdiń agroónerkásiptik kesheniniń turaqty damýyn qamtamasyz ete otyryp, ýaqytsha qarjylyq qıyndyqtardy jeńýge kómektesedi.
