Kóshpeli otyrys jumysyna Halyqaralyq ister, qorǵanys jáne qaýipsizdik komıtetiniń depýtattary, Qorǵanys mınıstrliginiń basshylary men komandalyq quramy, Qaýipsizdik Keńesi, Qarjy, Ulttyq ekonomıka, О́nerkásip jáne qurylys, Ádilet, Tótenshe jaǵdaılar mınıstrlikteriniń, Ulttyq ulannyń jáne oblystardyń, Astana, Almaty jáne Shymkent qalalary ákimdikteriniń ókilderi qatysty.
Májilis komıtetiniń hatshysy Aıdos Sarym Memleket basshysy Qasym-Jomart Toqaev óziniń «Ádiletti Qazaqstan: bárimiz jáne árqaısymyz úshin. Qazir jáne árdaıym» atty saılaýaldy baǵdarlamasynda aýmaqtyq qorǵanysty nyǵaıtý sharalaryn qabyldaý mindetin aıqyndaǵanyn atap ótti.
Qorǵanys mınıstri aýmaqtyq qorǵanys áskerleriniń memlekettik qaýipsizdikti qamtamasyz etýdegi mańyzdy róline toqtaldy. Álemniń kóptegen eliniń aýmaqtyq qorǵanysyna qarýly kúshterdi jumyldyrý, strategııalyq obektiler men áskerı jáne azamattyq ınfraqurylym elementterin qorǵaý mindetteri júktelgen. Rýslan Jaqsylyqov atap ótkendeı, Qorǵanys mınıstrligi jumyldyrý kezinde, áskerı jaǵdaıda nemese soǵys ýaqytynda aýmaqtyq qorǵanys qyzmetin zań júzinde bekitý máselesin pysyqtady.
Qorǵanys mınıstriniń birinshi orynbasary – Qarýly kúshter Bas shtabynyń bastyǵy general-leıtenant Marat Qusaıynov depýtattardy oblystar men respýblıkalyq mańyzy bar qalalardyń aýmaqtyq qorǵanysynyń aǵymdaǵy jaı-kúıin, sheshilýge tıis máseleler men olardy sheshý joldaryn egjeı-tegjeıli habardar etti. Bas shtab bastyǵy aýmaqtyq qorǵanys áskerleri men brıgadalarynyń negizgi mindetterin aıtyp berdi. Olar beıbit ýaqytta qysqartylǵan quramda ustalyp, al tótenshe nemese áskerı jaǵdaı rejimderin engizý kezinde jergilikti halyq arasynan áskerı mindettilerdi shaqyrý jolymen jınaqtalady.
Otyrys barysynda Astana qalasy ákiminiń orynbasary Eset Baıkenov pen Aqtóbe oblysy ákiminiń orynbasary Ǵalymjan Eleýovtiń baıandamalary tyńdaldy.
Bul rette aýmaqtyq áskerlerdiń keıbir oblystardaǵy jabdyqtalý deńgeıiniń jetkiliksizdigi, qarjylandyrý problemalary, osy salada memlekettik baqylaýdyń bolmaýy jáne basqalary nazarǵa alyndy.
Bıýdjettik qarjylandyrý, aýmaqtyq qorǵanys júıesin jetildirý jáne ınfraqurylym qurylysy syndy ózekti máseleler jınaqtalyp, kóshpeli otyrys barysynda aıtylǵan syndarly usynystar beıindi komıtettiń zań shyǵarý jumysynda eskeriletini atap ótildi.
