Atbasar qalasyndaǵy №5 orta mektepti bitirgennen keıin Qaraǵandy qalasyndaǵy E.Bóketov atyndaǵy memlekettik ýnıversıtetti támamdap, defektologııa mamandyǵy boıynsha dıplom aldy. Oqı júrip «Altyn besik» bóbekjaıynda tájirıbeden ótti. О́ziniń aıtýyna qaraǵanda, alǵashqyda óte qıyn bolǵanǵa uqsaıdy. Mundaı balalarmen jumys isteý ońaı emes qoı.
– Sábıler es bile kele ártúrli dybystardy qulaqtary shalady emes pe? Birte-birte sol dybystardy ózderi de aıtyp jetkizgileri keledi. Durys sóıleı bilse, bir jón. Mundaı jaǵdaıda ózderiniń jatyq, anyq sóıleıtinderine senimi molaımaq. Al eger keıbir dybystardy aıta almaı jatsa, qatty qysylady. Mine, osy kezde balanyń janyn áldebir názik sezimmen qabyldaı bilý kerek. Sonda ǵana eńbegiń nátıjeli bolyp, tálim-tárbıeńdi kórgen búldirshin kemshilikten arylady, – deıdi Atbasar qalasyndaǵy «Erkejan» bóbekjaıynyń logopedi Marına Edýardovna.
Tájirıbeli mamannyń aıtýynsha, keıingi jyldary mundaı kemistik beleń alyp ketti. Ǵalymdardyń dáıekti zertteýlerine qaraǵanda, damýynda túrli kemistigi bar balalardyń sany ýaqyt ótken saıyn kóbeıip keledi.
– Marına Edýardovna – óz isiniń shynaıy sheberi. Teorııalyq jáne tájirıbelik daıyndyǵy mol, óz bilimin sarapqa salyp júr. Oblys ortalyǵynda ótetin semınarlarǵa qatysyp, osy máseleni indete zerttep, avtorlyq baǵdarlamasyn daıyndady. Respýblıkalyq basylymdarda zertteý eńbekteri jaryq kórdi. Respýblıkalyq pedagogıkalyq konkýrsta birinshi dárejeli dıplomǵa ıe boldy, odan ózge de marapattary az emes. Eń bastysy, ata-analardyń alǵysyna ıe bolyp júr, – deıdi «Erkejan» bóbekjaıynyń meńgerýshisi Gúlden Qasymova.
Tilinde múkistigi bar balalarmen mamyrajaı otyryp, emin-erkin kóbirek áńgimelesý kerek eken. Olardyń boıyndaǵy kishkentaı kemshilikti nusqap kórsetý de qajetsiz. Bul arada qamyrdan qyl sýyrǵandaı eptilik kerek. О́kinishke qaraı, tirshilik qamymen júrgen ata-analar baýyr eti balalarynyń bul kemshiligine kóńil bóle bermeıdi. Ilki zamanda balalarmen til ustartý taqyrybynda ádeıilep jumys istemese de, janyn baýraıtyn ádemi ertegiler aıtqyzatyn. Al aqıqatynda eki jasqa deıingi balanyń bal kúlkisi, áldeneni byldyrlap aıtqany qulaqqa jaǵymdy estiledi. Eki jastan asqan soń bala áli de byldyrlap júrse, onda logopedtiń kómegine júgingen jón.
– Balanyń qatarynan qalmaı damyǵany kez kelgen ata-ana úshin – úlken qýanysh. Biz óz perzentimizdi «Erkejan» bóbekjaıyna bergen kezde Marına Edýardovnanyń jumys isteıtinin bildik. Ol balalarmen de, ata-analarymen de til tabysa biledi. Árbir balamen jeke-jeke jumys isteıdi. Biz únemi baqylap júremiz. Sondyqtan da mamannyń árbir tabysy biz úshin, bizdiń balalarymyz úshin jasalyp jatqan janashyrlyq dep qabyldaımyz, – deıdi ata-ananyń biri Iýlııa Molchanova.
Sóz arasynda túıgenimiz, Marına Edýardovnanyń ózi ustazdar áýletiniń ókili eken. Ájesi qyryq jyl boıy orys tili men ádebıetinen sabaq berse, anasy bar ǵumyryn mektepke deıin mekemede tárbıeshi bolyp ótkergen. Ilkiden jalǵasqan ilkimdi jumys osylaısha kóktep, kógerip keledi. Bar jaqsylyq sharapaty el erteńi balalarǵa tııýde.
Aqmola oblysy,
Atbasar qalasy
